Centenares di persona a protesta diahuebs pasa na Quito contra e aumento di e prijsnan di combustibel cu a ser decreta pa e gobierno pa enfrenta su dificultad economico.
Den filanan a lo largo di tres cuadra di e cayanan, e manifestantenan a marcha na e centro historico di Quito cu pancarta cu tabata bisa ‘gasolin subi, tur cos ta subi’ y ‘no na e paketaso’.
“E aumento di e gasolin ta haci daño na tur Ecuatorianonan, tur e subida di combustibel ta afecta e canasta basico”, Mesías Tatamuez, lider sindicalista a bisa.
Tatamuez a sigura cu e mobilisacion lo bay sigui na januari, ora tin premira e aumento di e prijs di diesel.
E gobierno di Lenin Moreno progresivamente a subi e prijsnan di combustibel, y a bisa cu durante 40 aña, e Estado a gasta miyones na subsidio, y na e momento dificil cu e economia Ecuatoriano ta atravesa, e ahustacion di e balornan ey ta necesario.
Segun e ministerio di Energia, den ultimo decada so, den e cual e iskierdista Rafael Correa a goberna (2007-2017), e subsidio tabatin un costo di 50.000 miyon di dollar pa e pais.
E gobierno a anuncia na augustus e aumento di e prijs di gasolin super, di octanahe halto. E galon Mericano a subi di 2,48 pa 2,98 dollar y diahuebs pasa a subi di 3,10 dollar pa por tin un prijs internacional.
E mesun siman aki e gobierno a aumenta e balor di e gasolin extra, di e mayor uzo na e pais. E prijs tabata di 1,48 a subi pa 1,85 dollar.
Segun e autoridadnan, e transporte publico y e sector di pesca no lo bay ta afecta pa e aumento di e combustibel, pa motibo cu nan lo bay ta beneficia di ‘compensacion’ cu te ainda no ta defini.
