Ecuador ta bibando su oranan di extremo dramatismo. Gobierno a anuncia cu ta traha pa duna un solucion pa retraso di busca e cadavernan na ciudad di Guayaquil, esun mas afecta pa e contagio di coronavirus, na unda ta reporta hende fayecido desde barionan popular te na zona turistico, memey di e desesperacion di e famianan pa falta di ayudo.
Autoridadnan a reconoce e dificultadnan pa retira e cadavernan di e personanan fayecido cu a muri den nan cas, sin cu nan a haya sa si nan tabata contagia di e virus, debi na e restriccion di circulacion, toque de queda y nerviosismo di e poblacion. Ademas, nan a señala cu tin cadavernan den hospital cu no a ser retira pa su famianan, nan no a detaya e cantidad.
Un testigo a mira e curpa di un homber riba acera, tapa cu un paña blauw cerca di e zona turistico di Guayaquil. Escenanan similar a ser reporta den varios punto di e ciudad ey.
E polisnan consulta riba e tema aki a bisa cu e homber a collapse mientras tabata para den un rij pa haci compras. “E intencion di gobierno ta cu tur, no solamente esunnan cu a fayece cu COVID-19, sino tur persona cu lo fayece den dianan aki na ciudad di Guayaquil mester wordo dera dignamente, acompaña di un representante di su religion” vice-presidente Otto Sonnenholzner a bisa den un conferencia di prensa virtual.
Ademas, gobierno a crea un forsa special, cu ta inclui militarnan y lo encarga di lanta y dera e curpanan, den e tempo cu a instala un santana publico. Sonnenholzner a bisa cu e cantidad di persona fayecido cu sintomanan di coronavirus ta aumenta y te na e momento a registra 10 morto den un dia den hospitalnan di e ciudad.
