Mas di seis mil persona a fayece den 15 dia. E indice desproporciona di fayecimento na e provincia Guayas den e prome quincena di april ta lanta pregunta tocante e berdadero alcance di e pandemia na Ecuador, na momento cu Organisacion Mundial di Salud (WHO) ta pidi tur pais aclaria nan cifranan.
Segun autoridadnan, tin un desfase di alrededor di 5,700 morto den provicia di Guayas, mas afecta pa coronavirus – cu mas di seis mil di e contagiadonan na nivel nacional, cu a supera e barera di nuebe mil – y unda normalmente ta muri dos mil persona pa varios causa.
Despues di compara cifra cu diferente institucion di estado, ‘tin aproximadamente 6,703 fayecido reporta den e 15 dianan di april na provincia di Guayas’, segun hefe di Fuerza de Tarea Conjunta (FTC), jorge Wated. El a indica cu e cantidad di morto den hospital ta ‘disminuyendo’, loke ta un ‘medida hopi alentador’, pero cu e cifra di fayecido reporta na otro registronan ta parce di ta hopi mas halto cu normal.
Teniendo na cuenta cu e ‘promedio mensual ta aproximadamente 2mil persona’, e desfase na e momentonan aki lo ta alrededor di 5,700 mas morto cu normal, cual Wated a atribui na Covid, presunto Covid, y morto natural’.
Calculacion cu no ta corecto segun Byron Villacis, ex director di Instituto Nacional de Estadisticas y Censos (INEC), ya cu durante pandemia tin morto cu no ta sucede ya cu tin cuarentena, por ehempel den transito of homicidio.
Segun minister di Gobierno, Maria Paula Romo, no por conoce e causa real di tur morto pasobra no ta haci test na tur fayecido. Sinembargo a colecta datonan pa tin causanan posibel, incluyendo covid-19.
