(EFE) – Comite di Operacion di Emergencia Nacional di Ecuador (COE) ayera dialuna anuncia cu a aumenta na “oraño” (preparacion pa evento inminente) e nivel di alerta pa emergencia cu por produci na e pais debi na e fenomeno marino atmosferico “El Niño.”
COE, integra pa autoridadnan di varios ministerio y institucionnan di asistencia y rescate, a informa cu a dicidi di cambia e nivel di alerta “geel” (precaucion of activacion pa menasa di un evento) cu tabata mantene for di varios siman caba.
E aumento di e nivel di alerta a ser declara debi cu presencia di e fenomeno natural “ta inevitabel y posiblemente lo coincidi cu epoca di awasero na e pais, den ultimo trimester di aña,” segun secretario di Gestion di Riesgo, Cristian Torres a señala.
Minister di Interior y presidente di COE, Juan Zapata a splica cu a adopta e resolucion despues di un analisis tocante e cumplimento di criterionan tecnico tocante e condicionnan oceanico y atmosferico presente di Ocean Pacifico.
E parametro ta mustra “un posibilidad grandi cu e fenomeno lo sucede pa e presente trimester,” Zapata a agrega despues di anuncia cu a diseña un Plan di Accion general pa enfrenta e fenomeno natural.
E Secretario di Gestion di Riesgo a splica cu debi na aumento den e nivel di alerta, gobiernonan local y otro entidadnan lo intensifica e desaroyo di plannan di accion den teritorionan vulnerabel pa ricibi e impacto di e evento.
Director de Instituto Oceanico y Antartico de Armada (Inocar), Carlos Zapata a señala cu entidadnan tecnico ta bay mantene un vigilancia estricto riba e condicionnan oceanico y atmosferico.
Dia 24 di augustus ultimo, Comite Nacional del Estudio Regional del Fenomeno de El Niño (Erfen) a adverti cu temperatura superficial di lama na Pacifico Oriental tabata presente iregularidad di hasta 3.3 grado centigrado, 1.3 grado mas riba e promedio considera normal pa e epoca.
