(Infobae) – Diaranson ultimo Gobierno di Ecuador a anuncia e segundo fase di regularisacion di ciudadanonan Venezolano cu lo cuminsa mañan diasabra cu atencion pa solicitantenan di asilo.
E proceso di regularisacion, cu a cuminsa 1 di september ultimo, a cuminsa cu “entrega di registro di permanencia” na e ciudadanonan Venezolano cu a dicidi permanece cu residencia na Ecuador, segun Canciyeria a informa den un comunicado.
E prome fase tabata den man di Ministerio di Interior, unda a entrega casi 100.000 certificado di registro di permanencia na esunnan cu ta desea completa e proceso.
Funcionarionan di Canciyeria Ecuatoriano y boluntarionan di Sistema di Nacionnan Uni na e pais ta bay participa den e fase nobo aki cu ta supone e validacion di e datonan di e persona di nacionalidad Venezolano cu a registra den e website pa emision di visa.
E website aki (www.estoyaqui.ec) ta bay drenta den funcionamento mañan 1 di october y ta bay ricibi informacion di e Venezolanonan di acuerdo cu e ultimo number di nan certificado di migracion.
E proceso di regularisacion ta digital y pa por complet’e mester presenta algun documentonan pa verifica si e persona a drenta na Ecuador for di cualkier punto di control te dia 1 di juni di 2022. Tambe e Certificado di Registro di Permanencia y otro papelnan pa haya e Visa di Residencia Temporal di Ecxcepcion pa Ciudadanonan Venezolano (VIRTE), segun e fuente a bisa.
Aunke e proceso ta gratuito, Canciyeria informa cu usuarionan mester paga pa un formulario di solicitud di 50$ y orden di cedulacion cu ta costa 10$.
Solicitantenan mester ta Venezolano, presenta solicitud di visa, paspoort original of cedula vigente.
Asina mes, e certificado di no tin antecedentenan hudicial na e pais di origen ni na Ecuador, mester tin un e-mail y documentonan apostilla.
