E compania Ecotech/Ecogas ta manera Bon Dia Aruba a indica, ta uzando diferente dump ilegal na Aruba pa deshaci di su sushi. Bon Dia Aruba ya a trece esaki dilanti siman pasa pero awor mas detayenan ta conoci.

Segun nos partner den noticia, Ret Karibense, e manager di operacion di Ecotech Andres Ras ta admiti cu ta opera den ‘area gris’. Cu esaki e ta referi na e dumpmento di e compania na un dump ilegal na Weg Fontein na San Nicolas y na Moko. Motibo ta cu no por a dump mas na Parkietenbos pasobra e dump aki a yega su limite.

E dianan aki tin preocupacion bou ciudadano y bisiña di Tropical Bottling Company na Balashi, di e mesun doño cu Ecotech/Ecogas  (famia De Veer) pa un buraco grandi cu nan a coba y yena cu sushi di e planta Ecogas/Ecogas. Compania bisiña ta keha di molester di holo. Manera Bon Dia Aruba a bisa ayera ta trata mas tanto di mata y resto di sushi ora a separa den e planta.

Doño Eduardo de Veer ta comenta cu nan ta trahando un parkeerplaats y asina ta yega e buraco cu productonan cu no ta causa niun daño na medio ambiente. Segun e tur cos ta na ordo pa yega e buraco cu e sushi.

Bon Dia Aruba a purba di haya confirmacion, entre otro for di Ministerio Publico cu ta den un comision cu ta anda cu dumpnan ilegal na Aruba. Sinembargo na e ministerio nan no ta na haltura. Riba social media hende a keha pero na polis no a drenta niun denuncia. Nos a yama e ora Bureau City Inspector y e director Marlon Pieters ta bisa cu e tampoco ta na haltura kico ta pasando na Balashi.

“Por casualidad riba Discovery Channel mi a wak un programa riba e tipo di saconan aki. Si ta esey nan ta haciendo, pues e proceso aki ta uno cu ami ta haya no tin nada malo cu ne.” E ta agrega cu e mes a pasa eybanda y no ta haya holo malo di sushi ni musca rond di dje. “Esunnan cu ta poniendo tipo di cosnan aki riba Facebook ta hopi mal informa, ta mal informa pueblo y tin hopi politica su tras.” City Inspector no a haya ningun keho ainda riba e situacion na Balashi.  E tipo di procedura aki ta pa deshaci di productonan no toxico cu ta bay bek den tera, cual segun sr. Pieters, ta algo cu Serlimar mes kier haci pero ainda no tin e forsa/ekipo pa logr’e.

Sr. Pieters ta conclui cu si bo busca riba internet bo ta haya sa mas di esaki cual ta wordo haci na Merca y Hulanda. “Kere mi esey ta e solucion pa dump, ami ta wak esey,” e ta bisa.

Sin embargo te awor Bon Dia Aruba no a haya un contesta clave di e instancianan di gobierno y autoridadnan si e compania realmente tin permiso pa dump nan sushi riba nan tereno.