Economistanan ta señala: Economia di Aruba lo experiencia collapse sin sosten di likides di Hulanda

Economia di Aruba lo mira un collapse sin precendencia, na momento cu no tin placa pa sostene salario di ambtenaarnan, docente y esnan cu ta traha den organisacionnan cu ta ricibi subsidio. Particularmente pasobra lo no tin tampoco e subsidio di salario cu Hulanda ta duna. Un subsidio cu a percura cu hopi hende por a keda traha, aunke cu un salario mas abou.

E asina-yama ‘ripple-effect’ riba henter e pais cu ya caba ta sufri bou un caida economico enorme door di Covid19 lo tin su refleho riba cada sector, hasta esnan cu ta sobreviviendo na e momentonan aki.

Economistanan ta siguiendo e desaroyo di e negociacionnan entre Aruba y Hulanda pa mira kico ta e proyeccionnan cu mester tene cuenta cune. Y e perspectivanan no ta mucho alentador. Hulanda kier un contesta awe y te cu ayera, no a yega na un acuerdo si ta dispuesto pa tene e argumentonan di Aruba na consideracion pa toch aproba e di tres sosten di likides.

Y esaki ta e presion grandi pa Aruba.

“E posicion di likides di Gobierno a seca completo. Na april a registra un caida di 46 porciento di likides compara cu e mesun periodo e aña anterior. Ta un caida hopi grave,” economista Rendell de Kort a bisa Bon Dia Aruba. “De por si, semper e situacion di likides di Aruba tabata hopi preta caba. E pagonan di salario y gastonan fiho semper ta un momento di suspenso.” Es mas ya caba Prome Minister Evelyn Wever Croes a adverti cu e probabilidad ta grandi cu Gobierno lo no por paga tur e salarionan pa fin di luna, si no haya sosten di likides di Hulanda.

E dependencia riba e placa di Hulanda ta grandi y si e no drenta Gobierno no por cumpli cu su obligacionnan. “Basicamente, mester realisa cu ambtenaarnan sin salario, organisacionnan cu ta haya subsidio di salario (fundacionnan manera SKOA, Wit Gele Kruis y otro) lo keda sin pago. Lo tin hopi mas hogar na Aruba cu ta keda sin entrada. E consumo na Aruba lo cay den otro.”

E perspectiva ey ta hopi demotivante, ta e opinion di De Kort y tambe economista Marielsa Arends. Ambos a mustra cu e desempleo lo bira mucho mas grandi ainda, te ora cu turismo recupera.

Tur cos ta depende di e recuperacion turistico, den caso cu no haya placa di Hulanda. Pero e lo ta un periodo hopi dificil mes. Pasobra simplemente Gobierno lo no tin e manera pa paga su gastonan fiho. Y un di e gastonan ta e pagonan di interes riba prestamo internacional. Si no paga esakinan, Aruba ta core un riesgo enorme di cay den su evaluacion di prestamo, esta su credit rating.

Motibo ta cu e interesnan pa cualkier prestamo lo aumenta drasticamente. Ya caba, segun De Kort, Aruba ta usa 15 porciento di su entrada anual pa paga interes so. Si nos pais bay atras den ‘rating’, e ta nifica cu un porcion mucho mas grandi mester bay pa paga pa fianzanan internacional.

E economistanan no ta kere cu nos no lo yega asina leu, pasobra e no ta cumbini Hulanda tampoco pa laga Aruba cay asina profundo den rating.

Florin

Otro efecto negativo si en caso cu Hulanda no manda sosten di likides ta e posicion di nos florin. De Kort: “E placa di Hulanda ta importante pa e balor di nos florin. Si no tin importacion di divisas, e balor di florin lo cay.” Hulanda a contribui na mantene e balor di florin cu e sosten di likides cu a manda anteriormente. Y e placa ta drenta den forma di dollar. “Si e cranchi ey cera, ta bay tin hopi presion riba nos reservanan y por conduci na inflacion. Y esey lo tin efecto pa e cuminda cu nos ta importa.”

E posibilidad pa haci uzo di fondonan existente, por ehempel, fondonan di pensioen pa yuda sobrepasa un periodo di falta di likides no ta un paso cu un pais por tuma tampoco. Es mas, segun De Kort, ta net den tempo di crisis mester percura pa no mishi cu e placa di Fondonan di Pensioen. “E fondonan di pensioen mester wanta na nan likides. No por fia na un cantidad grandi.” Pues tampoco lo por cumpra bononan di Gobierno pasobra de facto ta pasa e cuenta pa despues. “Y no tin claridad si e fondo lo por want’e. Si mishi awor aki na fondonan di pensioen, ta pone den riesgo e entrada di futuro.”

Con a yega asina leu?

Cu excepcion di tres aña, pa motibo incidental, Aruba nunca tabatin un presupuesto balansa. Y semper mester a haci prestamo pa por a cubri su gastonan. E proyeccion di 2019 tabata hopi espantoso. E debe tabata riba 90 porciento di Producto Bruto Nacional, GDP, segun e analisis di Banco Central di Aruba. Pero despues cu Bureau Central di Estadistica, CBS, a haci su recalculacion basa riba cuentanan anual, a mustra cu e GDP di Aruba tabata mas halto cu a kere. “Banco Central semper ta traha proyeccion, esta kico ta kere cu e futuro lo ta. CBS ta esun cu ta analisa e cuentanan anual. Pero pa algun aña, CBS no tabata haya e cuentanan anual pa analisa. Y aki Banco Central di Aruba a tuma e proceso pa trece conexion. E coreccion pues a bin despues cu CBS a haya e cifranan di Aruba.” Y e debe di 2019, a ‘baha’ na 79 porciento di GDP cu ainda tabata hopi halto. “Pa e aña aki, door di prestamonan di Hulanda pa e crisis di Covid19, e debe di Aruba lo ta na 139 porciento di nos GDP.”

Segun Rendell de Kort, hopi pais ta mira nan posicion di debe crece pa fin di 2020, pero esun di Aruba ta demasiado halto. Hasta cu e caida di GDP proyecta na 33.5 porciento.

“Semper tabata haci debe pa cubri gastonan coriente. Hasta cu tur e medidanan pa aumenta entrada, Gobierno di Aruba semper a scoge pa un maneho unda e gasto ta mas halto cu entrada.”

E nivel di debe aceptabel, segun normanan internacional ta 40 porciento di GDP. Ora un pais ta mantene su posicion di debe rond di e cifra ey, e ta ricibi prestamonan mas barata. Ademas, e ta permiti Gobierno haci prestamonan asina pa stimula economia. “E ta duna e habilidad na un pais pa actua ora di ciclonan economico.”

Status Aparte sin florin

Cu e aumento di debe a bin aumento di pago di interes. Y semper Banco Central di Aruba tabata adverti Gobierno pa no laga e fianzanan bay for di man. Rendell de Kort ta recorda tur Presidente di Banco Central di Aruba tabata adverti Gobierno pa e debe halto. “Es mas, Sr. Hassanali Mehran cu tambe tabata Presidente di Banco Central di Aruba pa un periodo, a bin Aruba pa prome biaha den e mision di IMF pa yuda Aruba prepara pa su Status Aparte. E tempo ey, IMF a conseha Aruba pa no bin cu su mesun Banco Central ni su mesun moneda,” De Kort a conta. “E argumento tabata cu pa cualkier pais chikito, e ta hopi dificil pa mantene disciplina financiero a termino largo. Motibo ta cu un pais cu no tin e facilidad pa maneha su moneda ta mas inclina pa ta mas disciplina. Sin florin, Aruba lo no tabatin e espacio pa amplia e cantidad di placa localmente. Automaticamente ta mara na mercado internacional, cu ta bin cu su rekisitonan. Camara di Comercio tambe a conseha Betico Croes, qepd, na 1985, pa no bin cu propio moneda. E comision di Camara di Comercio consistiendo di Eddy Porry, qepd, Miguel Mansur y Norman Kuiperi a participa na e negociacionnan pa Status Aparte di Aruba, den e periodo 1983 pa 1985. Mescos cu IMF, nan conclusion tabata cu e ta miho pa bay pa dollar. Motibo ta cu e ta forsa un gobierno pa actua cu mas disciplina cu su gastonan, ya cu no por imprimi placa su mes.

“Kisas por bisa cu ya tabatin e ‘writing on the wall,’ hasta prome cu Status Aparte,” Economista De Kort a conclui.