(DW) – Si un hende tabatin duda tocante e tema clave di eleccion presidencial di Merca, e prome 15 minuut di e debate di diamars anochi entre Donald Trump y Kamala Harris a keda bon cla: economia.
Memey di mal contento na Merca pa estado di economia, ambos candidato a tira culpa riba inflacion y a describi algun di su politica economico fundamental.
Trump a purba probecha e nostalgia posibel di e votadonan pa economia pre-Covid di 2019, ora e tabata presidente: “Mi a crea un di e mayor economia den historia di nos pais y nos ta bay haciele atrobe,” el a bisa.
Sinembargo, Harris a responde e acusacionnan di Trump cu administracion di Biden tabata culpabel di e crisis di inflacion cu a afecta gran parti di mundo desaroya na 2021 y 2022: “Loke nos a haci ta limpia e desaster di Donald Trump.”
Encuestanan ta mustra cu un mayoria claro di Mericanonan ta mal contento cu economia, y den particular, inflacion cu ta sigui keda un topico dominante. Un encuesta di YouGov/The Economist na juli ultimo a revela cu e cuestion di aumento di prijsnan, ta esun di mas importante pa votadonan na Merca.
William Reinsch, di Centro di Estudio Estrategico y Internacional di Washington, a indica prome cu e debate cu: “Poblacion ta hopi preocupa pa inflacion. Tur indicador ta sugeri cu inflacion ta disminuyendo y a disminui significativamente. No tur e prijsy no tur prijs di cuminda a baha. Pero poblacion te ainda ta parce ta den modo di “tur esaki ta teribel, pero obhetivamente e no ta.”
Adam Posen, presidente di Instituto Peterson di Economia Internacional, ta kere cu “den cierto sentido cosmico” por ta husto pa responsabilisa Harris di e inflacion anterior, “si bo ta presidente of bo ta parti di administracion, a bo semper lo ser husga pa e condicionnan general di inflacion y crecemento.”
Posen ta señala cu tin cinco area economico clave den cual e candidatonan tin diferencia: belasting, tarifa, migracion, regulacion y e rol di Reserva Federal.
Mientras Harris a priminti recortenan di belasting pa clase media, Trump a aposta pa extende e recortenan cu a haci pa companianan ora tabata presidente na 2017.
“Ta parce cu Harris ta mucho mas enfoca den politica cu lo yuda e pobernan y clase media,” Reinsch ta opina. “E creditonan fiscal di Trump ta beneficia principalmente esnan cu mas poder adkisitivo,” a señala.
Trump a menciona China varios biaha y a priminti aumenta tarifa di su prome mandato: “Si Trump ta haci loke ta bisa cu kier haci y ta restringi ainda mas e comercio cu China, ta bay tin inflacion, ta bay ta negativo pa crecemento di productividad, ta bay distorsiona tur tipo di cos y lo tin retroceso na henter mundo,” Posen a bisa.
Sinembargo, administracion di Biden a sigui den gran medida cu politica comercial proteccionista di Trump, y ta probabel cu Harris, si lo wordo eligi, lo mantene e tarifa existente.
