Economia ta recupera… Pero ta innova…?

Economia a cuminza move, esey sin discusion ta asina. Faltando 10 dia pa eleccion, esey ta un bonus pa e gabinete demisionario. Ta parce mas corecto di papia di e partido grandi den e gabinete, pasobra no tin tanto señal cu e otro partnernan lo probecha di e imagen positivo cu recuperacion economico ta brinda. Segun e diferente encuestanan cu a tuma lugar recientemente e dos partidonan chikito aki, pa motibo totalmente diferente, no ta parce di ta bay logra cos grandi. Un di nan ta sufri bao di e perdida di henter e top di e partido, y no ta parce di lo recupera facilmente di e situacion aki. E otro partner den coalicion tin e problema di tabatin e cartera ingrato di enseñanza, cu a bira foco di atencion di practicamente tur partido den e contienda aki. Awor, enseñanza ta importante, no tin duda di esey, pero pa tanto partido adopta esaki como cabay di campaña ta mustra manera un desinteres pa atende otro tema. Pa un parti esey ta di comprende tambe, pasobra tin varios tema cu casi ningun partido kier toca. Un di e motibonan ta cu nan ta e puntonan importante di e acuerdo cu Hulanda, cu ta kita gana di e mayoria pa papia di esakinan.

E situacion economico actualta brinda perspectiva un poco mas briyante compara cu loke tabata visible na inicio di aña. Si nos compara e proyeccionnan di crecemento economico cu Banco Central a publica den su Outlook na februari di e aña aki, nos por mira cu e proyeccionnan di e ‘Outlook’ di departamento di Asunto Economico ta mustra mas optimista. Nos no sa e motibo pakico a scoge pa un nomber cu CBA ta usando pa varios aña caba, pero ta spera cu e no ta conduci na confusion. Importante ta finalmente cuanto realismo e diferente proyeccionnan ta contene, y esey ta na fin di aña nos por bisa. En corto e proyeccionnan.

DEACI ta duna un crecemento pa 2021 di 5,1% di GDP nominal como su proyeccion basico, y un cifra di 10,9% den su scenario optimista. Banco Central algun luna atras tabata mantene un crecemento nominal di 2,2% den su scenario basico, y 5,0% den su scenario optimista. Un cambio bastante grandi, cu ta parce di ta basa riba e perspectivanan pa turismo cu den ultimo lunanan a cuminza cambia pa mas positivo. Nos no lo desea di enfatisa e diferencia den e proyeccionnan, laga tempo bisa nos kico ta kico. Naturalmente nos ta desea pa economia recupera mas pronto posible, esey riba su mes no ta un escogencia politico, ni sikiera den campaña electoral. Di tur manera nos tin hopi tereno pa cubri ainda. Segun e proyeccion di e departamento lo bay dura te 2023 promer cu nos mira cifra di GDP nominal comparable cu 2019, cu ta e aña logico di referencia.

Tur esaki ta futuro cercano y ta di spera cu cos desaroya den e direccion aki, sikiera pa por deshaci di e desempleo considerable ainda. Pa un gran parti esey ta depende di recuperacion di turismo so y esey mas ainda pasobra, despues di tur cos cu a papia di otro pilar economico, nos ta den e recta final di campaña y realmente nos no ta mira nada cristaliza. No cu esey ta sorprende nos, pasobra desde inicio nos a adverti pa demasiado optimismo pa por ehemplo rehabilitacion di e refineria, como pa e proyecto di cannabis, ambos ‘going nowhere’. Riba esey tampoco nos no a mira algo concreto di e proyectonan ‘innovador’ y ‘prometedor’, cu tampoco ta sorprende nos. Envez di kere den loke e Hulandesnan ta yama ‘gebakken lucht’ di e bunita presentacionnan cu por a mira, nos ta haya falta di e cosnan realistico cu si nos por haci. Nos no ta explota por ehemplo e bentaha cu nos por tin den comunicacion digital, combina cu nos habilidadnan di idioma. No cu nos tur ta na e nivel desea, pero esey ta cosnan cu nos por desaroya. Pero lamentablemente e ta requeri tambe deshaci di e monopolio di SetarNV pa nos por amplia e posibilidadnan den comunicacion internacional. Nos no tin impresion cu algo ta bay cambia den e sentido aki, mas ainda pasobra bao di e anterior gobierno a sigui e mesun maneho di mantene monopolio, ‘cueste lo que cueste’.

Tambe riba tereno di renobacion energetico nos no ta mira mucho ta move. Claro cu ta di elogia cu kier laga WEB cambia di heavy fuel oil pa gas natural, pero sigur sin un refineria, y e no ta bay t’ey, e posibilidadnan ta bira dificil. Pero aparte di esey, realmente nos mester constata cu tabatin un paro casi completo den desaroyo mas aleu di plannan pa sigui bay den direccion di energia renovable. Despues di e molinonan di biento y e parque solar na aeropuerto y riba tereno di refineria, ta parce cu no tin mas idea pa elabora ariba. Y por cierto cu den henter e debate practicamente e tema aki no ta bin dilanti. Y pa un motibo obvio, pero no positivo: No tin nada di conta… Aunke…, nos sa cu un grupo Hulandes a bin dilanti cu plannan den e direccion aki, pero parce cu nos lidernan a keda pega den e ilusion di refineria. ‘So much’ pa nan vision pa futuro.