(Infobae) – Ora Rusia a invadi Ucrania na februari, no solamente Ucranianonan a sufri, e prijsnan di trigo, petroleo y otro productonan basico cu ambos pais ta produci den cantidad grandi a aumenta, loke a supone un perhuicio grave pa paisnan cu problemanan di likides cu ta depende di importacion.
Sinembargo, algun lidernan mundial a mira e parti positivo, “e crisis aki ta un bon oportunidad pa nos” Jair Bolsonaro presidente di Brazil a bisa na maart. Di mesun modo, luna pasa Alberto Fernandez, presidente di Argentina a bisa cu su pais “ta un reserva di loke e mundo tin mester na e momentonan aki: cuminda y coriente”.
Economia Latino Americano ta resistiendo e guera miho cu otro mercadonan emergente. Pero e hogarnan di tur e region ta wak con nan presupuesto ta wordo afecta pa inflacion causa pa e guera. E golpi aki ta uni na otro desgracianan reciente. Den medio plaso e perspectivanan di algun economia Latino Americano ta tormentoso.
Incluso prome cu e guera, 2022 tabata priminti di trece hopi molester na mundo. Ora aña a cuminsa, e produccion tabata inferior compara cu e tendencia anterior na e pandemia den hopi economia, y e carga di e debe tabata substancialmente mayor.
E problemanan di cadena di suministro y aumento di prijs a hoga e consumo na hogarnan, mientras cu aumento di diferente interes den e paisnan mas rico a aleha e capital di e hende pober, aumentando e presion financiero riba companianan y gobiernonan cu ya caba tabata lucha pa yega na fin di luna.
Den contexto aki, Latino America a comporta basta bon den ultimo lunanan. E prijsnan di trigo y petroleo a aumenta mas cu 20% for di cuminsamento di guera.
Esaki ta un bon noticia pa Argentina, e di tres exportado di trigo di e continente Americano despues di Merca y Canada. E prijsnan halto di petroleo y gas tambe ta dunando impulso na exportado di hidrocarburo, como Brazil y Colombia.
Aunke e perspectiva a bira debil pa e mayoria di paisnan, Fondo Monetario Internacional a revisa e aumento di prevision di crecemento pa e aña aki pa Argentina, Brazil, Peru y Colombia.
