Directie Natuur en Milieu (DNM) y Bureau City Inspector (BCI) a reuni Diamars ultimo cu Alfredo Ruiz di Ecogas na e instalacionnan di EcoGas. Durante e reunion aki a clarifica varios punto di atencion cu a wordo mal interpreta recientemente, manera tabata e asunto di e stortvergunning.
Segun un comunicado manda pa EcoGas, e reunion a bay den masha bon ambiente y e departamentonan di gobierno a compronde na final cu no por papia di un dump ilegal paso e producto no ta desperdicio, sino material deriva di reciclahe. Fuera di esey, e tereno ta di zona franca y riba dje, EcoGas ta den posesion di un stortvergunning firma pa Minister Otmar Oduber mes.
Productonan deriva di proceso di desperdicio, Alfredo Ruiz a indica, ta materialnan cu nan ta deposita riba tereno di EcoGas cual ta productonan cu ta resultado di procesamento di desperdicio y cu tin un proposito pa recicla y exporta y no ta representa ningun menasa ambiental.
Permiso di Deposito
Durante e reunion tambe a evalua e situacion di tereno Freezone, na unda EcoGas ta ubica y segun articulo number 4 di e ley di Freezone, EcoGas no mester di un hindervergunning. Segun EcoGas, comunicacion ta parti di e solucion mirando cu nan ta sinti cu e resultado di e reunion aki tabata fructifero y ta spera cu esaki a clarifica e mal comprendemento encuanto deposito y composicion di e productonan cu ta riba tereno di EcoGas.
‘Nos ta sigur cu nos tur tin e mesun meta pa un maneho di desperdicio sostenibel na bienestar di medio ambiente di Aruba y aki ta unda comunicacion ta esencial cu tur stakeholders. EcoGas sigur ta dispuesto pa coopera y ta forma parti di e solucion’, asina Ruiz a finalisa bisando.
