Temporada di vakantie a cuminsa oficialmente. Tin hopi mucha cu ta bay den exterior como tambe tin otro cu ta keda cas of ta bay un campamento di vacacion. Semper ta na su luga pa tene na consideracion diferente aspecto cu por ta valioso durante e temporada aki. Departamento di Salud Publico di Aruba ta conscientisa mayornan y e muchanan cu algun conseho.
Ebrina Curet di DESPA, seccion Cuido Salud Hubenil a laga sa cu den vakantie ta hopi importante pa sinembargo tene cuenta cu movecion. Aunke kier haci e vakantie un tiki mas trankilo y descansa, ta importante pa mantene un poco di e structura cu tin durante orario di scol.
Akinan por menciona cu ta necesario pa tene un ora fiho pa come y pa come e tres cumindanan principal: desayuno, lunch y cuminda di atardi y inclui snacks saludabel entre e cumindanan. Durante e periodo aki ta un bon oportunidad pa purba recetanan nobo y varia cu color di fruta cu berdura, ofrece e muchanan cumindanan cu e no conoce ainda, come hunto den famia. E parti di movecion ta hopi importante, Curet a splica.
Ta importante pa e muchanan keda activo. E muchanan mester di movecion un ora tur dia. E lo ta bon pa bay cu nan cana den mondi, bay lama, haci un dia di deporte den famia of baila cu nan na cas. “Tin diferente manera pa muchanan keda activo”, e experto di DESPA a señala.
Banda di esaki tin campamento di vacacion cu ta wordo organisa manera Ban Move di IBiSa cu ta tres siman. Esey ta algo leuk pa e mucha bay, pero si e mucha mester keda cas lo ta bon pa haci algun cu nan tambe.
Traha un schedule of planea actividadnan pa cada dia ta yuda trece structura y calidad di tempo cu e muchanan. Tin mayornan cu ta traha, pero por papia cu un miembro di e famia pa haci e actividadnan cu e mucha y tene cuenta cu su alimentacion. Si e campamentonan no ta ofrece cuminda, corda manda e muchanan cu snacks saludabel y purba pone enfasis na e tres cuminda pa dia, Ebrina Curet a subraya.
Finalmente ta bon pa agrega cu den vakantie sa laga cum as frecuencia e mucha wak television, hunga cu tablet, telefon of uza computer. Esey ta OK, pero pone un limite cu esaki no ta mas cu dos ora y pa e mucha no come dilanti di e aparato electronico. Pa e come na mesa y preferiblemente hunto cu su famia. “Ora nos come hunto den famia nan ta siña e maneranan pa scucha otro bon, come nechi y tambe nos ta come mas saludabel”, Curet a bisa.
