Recientemente Manager di seleccion Pony League Big League, Ebby Paesch a sinta na mesa cu Minister President, Mike Eman. Durante e encuentro aki Ebby Paesch a splica Minister Eman con tur cos ta hinca den otro. El a splica con e federacion ta hinca den otro, di cual nan ta un fundacion y no un liga. E seleccion no tabata na altura cu Presidente di Pony League, Benjamin Francees a acerca Minister dr. Carlos “Alex” Schwengle, pidiendo un ayudo na ultimo momento.
Durante tur e problema aki, Benjamin Francees a presenta na oficina di Minister y no tabata sa cu Ebby Paesch lo tin un reunion otro siman cu Minister Schwengle, unda lo sinta hunto pa asina yega na un acuerdo. Benjamin Francees no a keda y a bay radio y un biaha mas a cuminsa ataca Minister Schwengle. E hungadonan mes a acerca Minister Schwengle, indicando cu nan kier hunga baseball y e mesun grupo aki lo biaha bou di Little League pa competi na Corsou. E hungadonan ta sinti cu a pone nan un banda tanto den Little League como Pony League.
E team ta sumamente rabia pa cu e situacion. Tambe tin hopi problema interno en cuanto e maneho di Pony League mes. E hungadonan no kier pa uza nan pa politica y respeta nan cu nan kier simplemente hunga baseball, cual ta un deporte cu nan stima. E motibo principal pakico nan no por bin na remarca ta pasobra Pony League ta un liga priva. Tin proceduranan cu mester tuma luga na momento di pidi subsidio den deporte. Y e procedura aki mester cana di tal forma pa asina un federacion bin na remarca pa haya un subsidio. Ebby Paesch a indica cu e hungadonan ta rabia pa motibo cu nan a para den solo pa recauda fondo pa un biahe deportivo, pero e team cu e yiu di Benjamin Francees, esta Jerrick Francees, ta hunga aden so ta bay.
