Eagle LNG Aruba a organisa dianan di informacion pa publico tocante proyecto di gas

Eagle LNG a organisa tres dia di informacion na unda a invita publico en general pa conoce mas tocante e proyecto pa trece gas natural pa Aruba pa genera coriente. E ultimo dia di informacion ta awe Diahuebs 14 di Juli, 6:00pm-9:00pm na MFA Savaneta.

Parti di estudio di impacto ambiental ta encera e practica pa por reuni cu publico y comunidad pa conoce cualkier inkietud tocante e proyecto, y asina por incorpora esaki den e estudio di impacto ambiental. Pues e encuentronan aki ta parti di agenda.

Manera conoci, e meta ta pa reemplasa e uso di fuel oil cu gas natural, na unda e gran bentaha segun Eagle LNG ta cu gas natural ta e combustibel di mas limpi pa por usa den genera electricidad. E proyecto ta consisti di dos componente, na unda dentro den un area na RDA lo construi e terminal na unda lo ricibi e LNG, y despues pa construi e tuberia (pipeline) pa manda e gas natural aki for di e terminal na WEB Aruba. Por a nota toch varios pregunta critico cu a bini for di comunidad, entre otro, manera kico lo ta e impacto economico di e proyecto aki, tax revenues, empleo y mas.

Durante e di dos encuentro Diaranson mainta, Leopoldo Henriquez, representante di Royal Netherlands Society of Engineers [KIVI] a remarca cu prome cu haci un Environmental Impact Assesment, mester haci un Safety Assesment. Sr. Henriquez a subraya cu: “A wordo treci dilanti caba cu boso ingenieronan no ta hopi na altura riba loke ta Risk Analysis y QRA. Nan ta falta e informacion y conocemento, specialmente na Hulanda unda tin hopi problema cu desaster grandi y p’esey nos sa hopi di dje. Con lo trata cu esaki?”

Eagle LNG ta contesta cu nan ta den proceso di desaroya e QRA y cu esaki lo wordo inclui den e Environmental Impact Assesment. “Nos tin hopi experiencia den construi terminal di LNG. Y tambe esey ta motibo pa kico nos tin Royalhaskoning hunto cu nos,” Sr. Alejandro Bastardo, Project manager di Eagle LNG Aruba ta comenta. Por medio di standard internacional rekeri pa diseña e facilidad di LNG y Pipeline, ta mandatorio pa haci un analisis di QRA, pues no mester preocupa, segun Eagle LNG Aruba ta enfatisa: “E QRA ta seguramente wordo inclui.”

Javier Diaz, Environmental Consultant di Eco Vision NV na Corsou, ta splica cu nan a wordo invita como un partido independiente pa analisa e situacion di flora y fauna den e areanan di e proyecto.
E ta splica Bon Dia cu e area di proyecto no ta e unico cos cu tin cu wak, mester tene cuenta sigur cu e area di impacto. “E areanan aki tambe mester wordo investiga pa mira con bo por bay trata cune of ahusta bo manera di construccion,” segun Sr. Diaz. E sistema cu Eagle LNG ta usando ta uno cu ta wordo usa na Alaska caba, na Aruba simplemente e escala lo cambia. E blueprint ta traha caba pa e area y e tecnologia t’ey tambe awor.

“No necesariamente mester warda 20 aña pa esaki bin Aruba, y naturalmente no ta zomaar mester bin haci e tampoco.” Aki Sr. Diaz ta referi na e Environmental Impact Assesment, na unda Eco Vision cu Royalhaskoning [Hulanda] ta bay wak tur e aspectonan pa “wak si e proyecto aki por wordo realisa of no, anto si e por wordo realisa, lo mester wak kico tur ta e consehonan pa duna pa tene cuenta cune ora nan ta bezig. Aworaki nos ta den e proceso aki,” Sr. Diaz ta bisa. Ta calcula cu pa Augustus of September 2022 lo por tin esaki cla, segun Sr. Diaz ta contesta Bon Dia Aruba, agregando cu Eco Vision tin hopi data [literatuur] pero pa loke ta e flora y fauna bo no kier solamente esaki y laga otro cosnan un banda, pues den e caso aki e ‘huidige situatie.’

E siguiente trabaonan ta pa e Terminal so, pasobra e Pipeline Road ainda no a wordo identifica. Ora cu esaki wordo identifica tambe lo mester bin un otro estudio riba e componentenan social, si e ta afecta hende na cas, si algo pasa kico por ta e impacto, si ta pasa den area den vegetacion, etc.

Alejandro Bastardo, Project Manager di Eagle LNG Aruba, ta conta reportero di Bon Dia cu hende ta asocia LNG como proyectonan grandi di gran escala. “Mester compronde cu e tecnologia ta existi caba na nivel mundial pa tur tipo di escala. Loke mester haci pa esaki ta economico pa e islanan aki ricibi LNG ta pa e wordo haci na un escala na e demanda cu e pais tin,” Sr. Bastardo ta splica. E ta agrega cu e tamaño di e instalacion ta haci pa e demanda di WEB pasobra e no por wordo haci mas chikito. “Esaki ta loke ta permiti pa por competi of hacie mas economico y reemplasa fuel oil,” Sr. Bastardo ta comenta na Bon Dia.