Den conexion cu Eagle LNG su trayecto y progreso pa loke ta proyecto pa trece gas natural pa Aruba genera coriente, nan a organisa nan di dos rond di session cu a tuma lugar na EPI Diaranson atardi. E meta di e encuentro particular aki tabata entre otro pa sigui brinda mas informacion tocante desaroyo di e proyecto aki y prome resultadonan di estudio ambiental.

Diaranson atardi a tuma luga segundo session di Eagle LNG den cuadro cu campaña di conscientisa y informa publico riba e prome resultado di estudio ambiental. A cuminsa cu e fase di colecta informacion for di comunidad cual a wordo haci na Juli 2022 na MFA Savaneta. Despues di esaki e compania ambiental a haci algun progreso riba varios aspecto di e proyecto y awor e resultadonan aki a wordo presenta na comunidad. “E prome encuentro a trece varios feedback cu ne, un di nan ta cu e publico ta contento di por tin e oportunidad pa siña mas tocante e proyecto,” sr. Alejandro Bastardo, Project Manager pa Eagle LNG, ta splica reportero di Bon Dia Aruba. LNG cu gas natural ta mescos segun sr. Bastardo, pero LNG ta Liquid Natural Gas y ta algo nobo pa Aruba. “Tur comunidad su preguntanan ta tuma den consideracion y nan input. E proyecto aki tin un pipeline di gas natural nobo cu lo ta bao di tera, awe nos ta bay splica mas den detaye con esaki lo traha.”

Hopi ta puntra kico ta nifica pa tin gas natural pa Aruba, cruiseships por ehempel cu ta core riba LNG si nan lo por tin supply na Aruba, y asina hopi otro punto mas mirando e desaroyo y uzo di Fuel Oil.

“Pa motibo cu Pos Chikito no tin un facilidad manera un MFA nos a acerca varios persona cas pa cas na pos chikito tambe por ehempel por a splica varios hende y nan ta contento di por compronde, y cu nos ta acercando nan pa informa nan riba e tur esaki y con e sistema di pipeline lo wordo instala,” sr. Bastardo ta comenta. Tin algun seccion den Pos Chikito unda no tin mucho espacio entre algun propiedadnan na unda e pipeline existente ta – eynan e nobo lo bin bao di tera – pero no tur caminda pa motibo cu tin areanan cu esakinan no lo por wordo construi. Sr. Bastardo: “Hendenan ta contento di compronde cu no lo bin disrupcion grandi pa motibo di construccion y cu e lo ta leu for di nan, e ta trata riba e combersacion, dialogo y oportunidad pa tur hende puntra pregunta y haya nan contesta.”

Den e session aki a subraya riba e prome resultadonan di e estudio ambiental cual ta cubri bida marino, flora cu fauna y cualkier otro area ambiental sensitivo cu ta impacta e proyecto, “cual no lo ta e caso pasobra nos ta den RDA, cual ta den area industrial y e pipeline lo ta mayoria riba pipes existente y na areanan cu lo tin un impacto ambiental hopi abao. Awe nos ta informa riba con e pipeline ta wordo hinca den otro tumando na cuenta tur informacion di compania di telecomunicacion Setar, Elmar, y nos a bin cu mapanan detaya pa mustra unda e pipeline ta bay ta,” sr. Bastardo ta conclui.

Javier Diaz, Environmental Consultant di Eco Vision NV tabata presente atrobe pa e session aki y ta splica reportero di Bon Dia Aruba cu el a bin pa haya informacion riba e resultadonan di e onderzoek, Eco Vision mes a forma parti den busca dato di Flora y Fauna den areanan di Pipeline y Terminal Area.

Mester zorg entre otro: pa e tortuganan di lama ta safe den e area, zorg cu bo por wak zona di impacto no solamente riba e ‘footprint zone’ pero tambe pa tin den consideracion e area pafo di esey, pa no wak solamente caminda e pipeline ta bin pero tene cuenta tambe caminda esaki lo wordo poni, ki vegetacion esey lo impacta y ‘nature corridors’ cu tin na Rooi Lamonchi/Spaans Lagoen y varios punto mas.

Den combersacion cu un ciudadano cu tabata presente na e session aki, cu ta bisa reportero di Aruba cu e ta un ex trahado den sistema di pipeline den tempo di Valero, e ta bisa cu e ta haya esaki bon tog pasobra e lo ta bao di tera. Sinembargo e ta pensa: “No lo tin problema si tin un leak of explosion si e ta bao tera, anto e ta bay directo na e machine, cual ta poco straño si paso e no tin backup.” E ta sigui bisa nos cu: “Kico ta pasa ta ora tin un blackout, bo no por preveni un blackout, si esaki pasa e ta cera, con por preveni esaki ami ta puntra.”

Bon Dia Aruba lo sa di sigui informa riba e resto di desaroyonan y locual ta resultadonan di estudionan ambiental den siguiente edicionnan venidero.