Eagle Casino a cera su porta y no tin perspectiva pa awor. E ta nifica cu tur 69 empleado ta sin trabao. Bon Dia Aruba a haya confirmacion di e informe aki for di Gerente General di Eagle Resort, sr. Richard Roy.
Segun sr. Roy, realidad di e situacion economico y di COVID-19 ta cu simplemente no tabata posibel pa a sigui cu e casino habri. Consecuentemente a yega na un acuerdo cu e trahadonan, den su concepto. Riba e pregunta si a ofrece pakete of cesantia, no por a haya contesta. Segun Richard Roy na Bon Dia Aruba, “esey tabata un negociacion priva entre e compania y e trahadonan.”
Hubert Dirksz, Presidente di FTA sinembargo a bisa cu no ta cuestion cu a djis kita e trahadonan. E empleadonan di Eagle Casino a haya un carta cu un oferta y tin un siman pa dicidi pa accepta esaki. “E trahadonan ta bay rechasa e oferta. E mesun doño di e hotel ta doño di e licencia. E casino ta parti di e hotel. FTA en todo caso no a bay de acuerdo cu e decision pa retira trahadonan.” Segun Dirksz, tin hopi peticion ta yegando Corte pa disolve relacion di trabao, pero esey no ta nifica cu e ta bay asina facil pa djis kita trahadonan.
Prome di varios
Mester bisa cu analistanan y hasta Director di SVB Ing Edwin Jacobs a adverti cu pa 2021 e situacion laboral/ economico pa companianan na Aruba lo por bira pio cu 2020. Hasta cu continuacion di subsidio di salario, hopi compania lo no por wanta e peso financiero, mirando cu no tin reserva mas. Consecuentemente, lo por mira mas compania cera nan porta den e proximo simannan y lunanan. Ademas, cu mas caso di COVID-19 na Aruba tambe, e ta nifica mas medida pa mitiga e pandemia y consecuentemente, mas sla pa e sector di horeca.
