Tin señal bon cla cu un acuerdo tocante e pago di e debe cu gobierno di Aruba tin cu Hulanda no ta un proceso facil. E punto clave riba mesa awor aki ta cu gobierno di Hulanda kier mira aceptacion di un ley di Reino (Rijkswet Aruba financieel toezicht; RAft) como continuacion pa e actual supervision cu ta hinca den un ley local (LAft), cu ta vence na october 2023. Hulanda lo no ta dispuesto mas pa continua e ley di Aruba, y kier mira e supervision financiero di Aruba hinca den casi e mesun ley di supervision cu ta conta pa Corsou y Sint Maarten. Ta bon pa tuma na cuenta cu e actual ley Arubano aki tambe ta un copia hopi fiel di e ley di supervision pa e dos otro islanan. Loke a pasa na 2015 ta cu, ora a acepta e propuesta di gobierno di Aruba pa hinca e supervision den un ley local, Hulanda tabatin un actitud di “no ta importa nos con, basta boso acepta e supervision”. Y asina a sucede cu nos a termina teniendo un ley local cu e peculiaridad di contene responsabilidad y derecho di gobierno di Reino, loke naturalmente mester ta den un ley di Reino. Hulanda anto ta desea awor di ‘set the record straight’ insistiendo riba aceptacion di e ley di Reino. A cambio ta ofrece un areglo faborable pa e debe cu Aruba tin cu Hulanda, cu condicion di interes considerablemente mas faborable cu loke Aruba lo por haya riba mercado di capital. Ademas, e porta pa capital den exterior ta habri solamente si gobierno di Reino duna aprobacion pa tal prestamo. Ta parce awor cu e asunto aki tambe ta birando tema di debate. Pa clarifica esaki: riba kico e aprobacion ta basa? Articulo 29 di Statuut ta bisa textualmente:

  • Inciso 1: Het aangaan of garanderen van een geldlening buiten het Koninkrijk ten name of ten laste van een der landen geschiedt in overeenstemming met de regering van het Koninkrijk.
  • Inciso 2: De raad van ministers verenigt zich met het aangaan of garanderen van zodanige geldlening, tenzij de belangen van het Koninkrijk zich daartegen verzetten.

Nos a scoge pa duna e texto den e idioma original, asina cu lo no tin duda cu algo lo a bay perdi den nos eventual traduccion. Nos interpretacion di e texto ta cu, mescos den otro asunto legal, gobierno di Reino tin e obligacion pa evalua y aproba tur prestamo cu e paisnan den Reino ta desea di adquiri fuera di Reino. Eventual experiencia anecdotico unda gobierno di Hulanda (y di Reino) no a tuma e responsabilidad aki na serio ta keda irelevante na momento cu Conseho di Ministro di Reino expresa e voluntad pa eherce nan responsabilidad tal manera Statuut ta bisa. Y tin algo mas pa tuma na cuenta: na momento cu un gobierno insular cuminza sondea mercado pa prestamo, e promer pregunta ta: con ta para cu e aprobacion Hulandes…? Tin tres aspecto cu ta di importancia aki. Uno ta cu, na momento cu un pais insular den Reino acepta un prestamo cu no por carga aprobacion di Reino, esaki por tuma accion pa obliga e pais ey cumpli cu e hecho cu no tin aprobacion. Finalmente esaki por trece un intervencion di gobierno di Reino; no ta necesario pa splica kico esaki ta encera. Tambe tin e posicion di e instancia fiador cu eventualmente ta desea di fia Aruba. E entidadnan di reputacion lo no pasa pa fia placa a sabiendas cu e garantia y supervision Hulandes lo no t’ey. Esey ta implica cu ta solamente e tribonnan di mala fama internacional lo ta dispuesto pa fia Aruba placa, y ta di spera cu gobierno di Reino den un caso asina lo cumpli cu su deber di proteccion di su ciudadanonan den e teritorio ey y ta interveni. Relaciona cu esaki tambe e di tres aspecto: e entidadnan di rating financiero. Ta conoci entre esnan cu tin o tabatin contacto directo cu e entidadnan aki, cu e relacion cu Hulanda a haci cu Aruba no a baha mas ainda den rating den ultimo añanan. Esaki pa e garantia di un pais prospero cu tin un rating sublime. Un gobierno di Aruba cu lo kier busca su propio rumbo den e mundo aki lo ta cana perdi y no lo haya solucion realistico y viable. Ta parce cu pa di tantisimo vez nos ta presencia un wega di mustra cierto fortaleza mientras finalmente no tin e poder pa cana e caminda ey. Ademas, esaki lo ta a costo di e ciudadano cu finalmente mester bay paga e aventura aki. Nos a mira tur esaki tuma lugar un biaha caba, tempo cu gobierno envez di firma mesora cu Hulanda a bay agota primeramente e posibilidadnan local. Despues mester a entrega toch pasobra e magnitud di necesidad financiero a causa di Covid tabata demasiado pa carga di otro manera. Den e situacion actual atrobe ta topa cu e mesun realidad ey, y gobierno tin varios luna ainda pa keda bira rond sin acepta e realidad manera e ta. Nos no ta un pais soberano, pero un entidad autonomo dentro di Reino Hulandes. Den henter e discusion cu ta surgiendo awor atrobe, gobierno di Aruba no kier supervision, pero no ta na nan pa dicidi. E cos yama autonomia, pasobra e no ta independencia, y nos ta topa aki atrobe cu e mero limitenan. E supervision t’ey pa keda…

LJMADURO – 03-MEI-2023