Gregory ‘Arubian Assasin’ Milliard a bishita scol primario st. Franciscus College na Madiki pa duna algun charla, practica y un rato di inspiracion cu e muchanan.
E deportista ta bisa cu el a expresa caba na gobierno entre otro cu e tin e yabi pa yuda resolve problemanan den hubentud cual e ta bisa ta deporte y disciplina. “Nan ta bisa cu muchanan/hubentud ta den problema anto ami ta bisa nan cu ami tin e yabi anto esaki ta e yabi, deport”, sr. Milliard ta expresa. Recientemente sr. Milliard a bringa na Sao Paulo, Brazil contra Alexandre Hoffmann den e Absolute Championship Berkut unda cu el a gana den un tempo di 1:54 durante su debut den ACB.
St. Franciscus College mes a invita Milliard pa pasa e scol kende mesora a tuma e invitacion aki sin basila segun e cabesante. E intencion tabata pa e bin duna un charla pa e muchanan y ya cu e scol tambe ta considera Milliard un persona di inspiracion pa hubentud, nan tambe a entrega sr. Milliard un plakkaat di aprecio y honor. “Na final di dia mi tabata un mucha tambe cu un soño. Nunca mi lo a pensa cu mi a yega unda mi ta y na momento cu mi a cumpli mi prome soño mi a kere mi tabata cla, pero mi nunca a give up”, e deportista ta expresa.Sr. Milliard ta number uno den Caribe awor anto a caba di drenta door di e portanan mundial.
E deportista tin diferente cosnan cu e ta bezig cu ne manera tambe awor trahando cu muchanan den OC (Orthopedagogish Centrum Aruba). “Muchanan tin hopi energia sin sa unda pa kim’e. Anto nos ta man crusa y wak nan perdi riba caya. Nos por haci un diferencia y si bo pone e hendenan corecto dispuesto pa traha, y no pone institutonan cu ta djis pa traha cen sin haci nada pasobra di berdad nan no ta worry. Asina nada no ta sosode”, segun sr. Milliard. E deportista ta convenci cu na momento bo pone e hendenan cu ora bo yega e muchanan tin un respet pe, e ora bo ta wak un diferencia. E cabesante Nadine Kirindongo mes ta bisa cu el a tuma nota muchanan cu tin algun problema cu conducta cu no normalmente no ta scucha, nan a pone hopi bon atencion durante e charla di sr. Milliard y por a sigui instruccionnan masha bon. Pues no ta cuestion cu mucha no ta tende, e ta mas riba e concentracion segun sra. Kirindongo.
Segun sr. Milliard ta sigui bisa: “Bo mester sa con pa target e pasobra un mucha cu problema na cas bo no por target cu autoridad. Bo no por bringa candela cu candela. Bo mester bin diferente y tin biaha ta tuma di nan mesun hende pa saca e calma den e hobennan.” E deportista a enfatisa na e muchanan cu tur cos den bida lo ta un lucha y bo no mester give up, tin durf y tuma bo chens. “Specialmente nos na Aruba cu tin hopi miedo di sali for di nos zona di comfortacion. Sali for di dje pasobra asina bo no lo conoce bo capacidad total”
