Hulanda a paga 75 miyon euro, cu ta mas di 160 miyon florin na 2020 pa yuda e paisnan den Caribe combati COVID-19. Esey ta e informacion cu Bon Dia Aruba a ricibi for di Ministerio di Salud di Hulanda, VWS.

VWS no a specifica cuanto a bin pa Aruba, of a bay pa e otro islanan, pero e suma ta unicamente pa 2020, unda a paga pa hisa e capacidad di ICU ademas pago di personal specialisa pa traha den e unidadnan.

Bon Dia Aruba a acerca VWS cu e pregunta, a base di e critica di Gobierno di Aruba, particularmente Ministerio di Salud di Aruba cu Hulanda a impone un cortamento den gasto di AZV den un momento dificil, y cu a afecta hopi hende negativamente. Minister Dangui Oduber a describi e condicion como “cruel.” Y Prome Minister Evelyn Wever Croes a anuncia cu ta bay stop cu e cortamento di 5 miyon florin pa luna riba gasto di AZV y tambe a hala aden e lista positivo di remedi cu AZV ya no ta cubri. Prome Minister a bisa cu mester bin cu un plan nobo (red. Bon Dia Aruba a acerca AZV si a cuminza aplica e instruccion di Gobierno, pero e vocero a mustra cu ainda no tin informacion pa duna).

Thomas Breedveld, vocero di VWS a bisa cu “ya e ta mas cu un aña cu ta duna ayudo pa sostene e paisnan maximalmente pa bringa COVID-19. Tabatin 75 miyon euro pa e islanan pa cubri entre otro e aparatura di ICU, personal, material di proteccion personal, remedi,” Breedveld a bisa. “Pero, no ta posibel ainda pa specifica cuanto a bay pa cada isla. E specificacion no ta posibel ainda, particularmente pasobra tin un colaboracion entre e hospitalnan pa yuda otro cu pacient y pone personal disponibel.”

Segun informacion ricibi, tampoco tin specificacion ainda pa e situacion na Hulanda mes.

Hulanda a paga pa vacuna

Di otro banda, Bon Dia Aruba a compronde cu cada hangua di e vacuna Pfizer ta costa 12 euro, cu ta casi 26 florin. Si tuma tur e personanan vacuna, cifranan di DVG ta mustra cu 54,650 persona a haya vacuna. Tur ta di Pfizer te cu awor. E ta nifica cu Hulanda a cubri e 1.420.900 florin na vacuna cu a keda duna te cu awor. Esaki ta sin e gasto di refrigeracion (freezer special) ni e transporte.

Charlaine Huntington di Dr. Horacio Oduber Hospital a bisa cu di su banda, hospital no por bisa nada di e gastonan cu VWS a haci na Aruba, y sigur no riba e vacuna. “HOH ta indica na VWS kico mester na personal y nan ta percura pa nos haya e sosten cu nos mester, te unda cu por,” Huntington a splica.