Aruba ta keto bay den un impasse. Gobierno ta ‘tranca’ y no tanto pasobra tin e conflicto cu e ministro encarga cu Infrastructura, pero mas pasobra otro ministro(nan) a dicidi cu nan no ta bin reunion di Conseho di Ministro; cu otro palabra, nan ta nenga di eherce nan funcion como debe ser. Sin embargo, tur esey ta parce e ‘normal nobo’ aki, cu ministronan por simplemente bloquea funcionamento di gobernacion y spera di gana voto cu esey tambe.
Mientras tanto, e ministro cu supuestamente mester a baha, a yega Aruba atrobe, y e decision cu mester tuma ta si ta continua cu e reunion suspendi dia 31 di juli. Un decision fastioso pasobra a suspende e reunion pasobra loke e mandatario den promer tanda a trece dilanti ya tabata suficiente pa causa panico entre su adversarionan den y pafor di sala. E pregunta ta e mesun di algun siman pasa: ta sigui cu e reunion tumando e riesgo cu mester duna e ministro palabra, pa despues pasa e mocion di desconfianza? Aki ta bin inmediatamente e siguiente interogante, si lo tin un mayoria den sala pa aproba e mocion. Decisionnan dificil cu ta mustra cu nada no a cambia desde e dia ey. Tambe por nota cu e intento di mediacion no a cuminza riba bon pia, pasobra e partidonan cu mester sinta na mesa, ta wardando riba otro. Esey tanto Ministro Presidente como e ministro di Infrastructura a laga sa. Aki tambe ta parce wega di mucha ta tumando lugar, unda mester bisa cu e ministro acusa tin mas razon den e sentido cu e no tabata na ningun momento e partido cu tabata actua, mas bien esun cu tabata defende su mes contra ataque. Pues e no tin pakico tuma iniciativa, parce nos.T ambe ta logico cu esun mas halto den herarquia mester propone fecha, lugar y ora. No mester haci problema di e cosnan aki.
Sin embargo, tin momento cu ta parce nos cu e ‘conflicto’ aki ta masha conveniente den e relacion cu Hulanda, unda por bisa cu no por tuma decision den asuntonan grandi, pasobra conseho di ministro no ta reuni. Si esey ta berdad anto di mes esaki no ta bay yega asina leu, pasobra no por sigui posterga e asunto eternamente. En todo caso, na e momento aki nos no sa con e asunto aki ta bay termina. Si ningun kier hala atras, anto ta cos malo so por bay pasa. Y ningun por hala atras sin perde cara, pues ta dificil pa bisa kico ta bay pasa.
Pero esey na e momento aki no ta e punto mas importante. Esey ta e hecho cu e proceso di consulta cu Hulanda a bira algo interminable, cu lo yega solamente na un final si no tin placa mas pa gobierno cumpli cu su compromisonan. Loke a atrae nos atencion ta cu un di funcionarionan mas envolvi den e aspectonan financiero, director di finanzas, ta bisa abiertamente cu e unico cos cu a sucede, cu “un luna a pasa”. Pues no tin avance, no den e sentido cu a logra cu e Hulandesnan a move sikiera un inch den direccion di Aruba. Pa esnan cu a lesa e documento cu Prome Ministro a suministra na Parlamento, por a ripara bon cla cu riba ningun punto di peso tin concesion di banda Hulandes. E deseo expresa pa Prome Ministro pa no bin cu un ley di Reino pa supervision financiero, sino mantene e ley di Aruba (LAft) ta parce nos un intento pa haya e partido den oposicion na su banda, ya cu ta nan producto intelectual e tabata. Pero, di otro banda ta un ilusion pa kere cu e Hulandesnan, despues di e debacle den Staten unda a malogra e ley aki aña pasa, lo bay duna Staten un otro oportunidad pa sabotea acuerdonan logra cu gobierno di Aruba. Den e sentido ey posicion di Promer Ministro no ta nada facil, pasobra yega na un acuerdo demasiado rapido cu Hulanda lo ser usa contra su persona, pasobra supuestamente e lo ta bendiendo nos autonomia barata. Den su ultimo aparicion den Parlamento siman pasa el a pidi pa alternativa, si e sala no tabata di acuerdo cu loke Hulanda ta propone. E no a haya nada, y esey tabata di spera pasobra Staten tabata parce mas bien un klas di mucha di scol rebelde cu ta yenando e klas cu avion di papel; protesta pero nada mas.
Segun cu tempo pasa ta Aruba su posicion lo bira mas debil, mientras Hulanda no mester tin pura. Y segun tempo pasa, e presion for di den comunidad lo bira mas fuerte. E diezmiles di hende cu ta depende di e ayudo Hulandes ta pone hopi mas peso den e balance cu e mandatarionan lo desea, pasobra lo yega na un punto unda no por ignora mas e interes di tur e hendenan ey, y pa bon motibo: nan mester come! Pa colmo, e brote reciente di coronavirus a caba di tira nos back den un situacion mas grave cu na maart. Cu of sin ‘trancazo’ den gobierno nan por sigui rek tempo, pero e final ta na vista caba. Djis aki a pasa un luna mas, y nada a cambia. Ban sigui warda.
