Wepa! Solo a sali, temperatura a subi, un djis tur hende ta cuminsa cana mita sunu na universidad pero nos t’ey! Mi hendenan ban papia, falta tres luna so mas pa e aña escolar caba y felicidad a cuminsa drenta mi body.

Ta manera ayera mi a laga Aruba y ya awo mi segundo aña na universidad ta cabando. Tempo ta riba un rush y ami contento pasobra uhm, wel, boso sa min gusta Hulanda ni un tiki. Ta dushi cu a cuminsa bira un poco calor ta berdad, pero Utrecht na contrario di Den Haag y Rotterdam ta un stad chikito cu cayanan cu no ta amplio suficiente pa e cantidad di hende. Pues e dianan di cana alerta pa bo no dal den hende y yega un café trempan pa bo haya luga di sinta ta akinan.

Ta birando calor, dus tur hende ta sali di cas. Un tiki distancia di feminismo, racismo, politica y tur e badabada pa un rato, awe mi tabata pensa riba con Hulanda a cambia mi actitud y por lo general actitud di otro studiantenan cu ta bin aki tambe. Manera boso sa mi ta entrevista hopi studiante y cu excepcion di un of dos cu a gusta Hulanda y ta wak nan mes ta haci nan bida akinan. Mayoria ta comparti e sentimento di kier bay bek nan isla. Hulanda bou di solo ta diferente cu Hulanda bou friu, pero e ta keda Hulanda. E no ta ni yega cerca na ta Aruba.

Poco dia pasa ma bay topa un di mi miho amiganan di Mavo na Almere. Nos a traha pastechi, haci poco redo, baila y recorda temp’i nos tempo na Aruba. E tabata conta mi con Hulanda a cambia su actitud den un manera asina radical cu tin ora su guy mes ta puntr’e “Ma bon ta dicon bo ta cana cu cara rabia asina?” E ta bisa cu na cuminsamento, e tambe tabata yena cu entusiasmo. Claro, ami tambe, tur cos ta nobo, bo ta sinti liber, bo ta leu di cas. Te ora realidad dal bo. Bono ta un turista, den un manera bono ta bon bini y si tur hende ta wak bo rabia, bo tambe ta bay cuminsa wak nan rabia. E ta bira un mecanismo despues di tempo, paso si tur caminda cu bo drenta bo bisa “bon dia” y niun hende ta contesta bo, bo ta stop. Si tur caminda bo bay bo ta drenta alegre pero hende ta haci manera cu bo no ta existi bo ta stop. Y e no ta cu bo precisamente kier, e ta djis cu adapta na trata hende manera nan ta trata bo ta mas facil cu constantemente keda purba di ta e diferencia.

Mi ta splica un otro amiga di mi, cu mi bida completo na Hulanda ta sinti manera un ilusion manera algo cu ta existi den mi cabes pero no necesariamente ta real. E ta manera mi ta flota den otro dimension y mi solamente ta na bida ora mi ta na Aruba of otro caminda. Lisboa y London tabata masha leuk! Pero anyways, ki dia mi tabata core bais den vecindario y un bus a hera dal un mucha. Mi prome instinto tabata bisa mi pa bay puntra si e ta okay, pasobra mi mes a haya poco nervio pero despues mi a corda cu esaki no ta Aruba y otro banda di caminda su mama tabata ward’e.

E muhe cu ta biba den e camber band’i mi, tur ora ta yora manera cu nan ta mat’e. Mi prome instinto tabata pa bay puntr’e kico falt’e, si mi por yud’e cu algo. Pero mi ta corda cu tur ora cu e yega cas e no ta ni cuminda dus pakico lo mi bay papia cun’e. Y asina tin mil y un ehempel mas, caminda mi tabata kier tin un reaccion na algo cu a pasa pero, tiki tiki e ami cu tabata “hende di tur hende” a cuminsa disparce. Pasobra si bono ta worry cu mi, pakico mi tin cu worry cu bo? Hopi di mi miho amiganan a bay bek Aruba pasobra nan no tabata por mas cu e diferencia cultural. Y mi no ta culpa nan, e realidad aki ta duro. Pero mi ta pensa cu un bida sin un diploma, lo ta mas duro ainda specialmente pa muhenan cu ta bin di unda ami ta. bin. Pues mi ta pensa cu si ami guli manda abou y caba mi estudio, e lo inspira otronan pa haci mesun cos. Nos no ta adapta pasobra nos kier, nos ta adapta pa sobrevivi. Pero, si un di boso haya mi ta drenta na un luga na Aruba sin bisa “bon dia”, bo ta bini pa pasa mi un bofta y corda mi cu ta Caribense mi ta.