E hobennan na America principalmente ta muri pa causa evitabel: homicidio, accidente di transito y suicidio, e Organisacion Panamericano di Salud (OPS) a alerta diamars, ora a publica su informe mas reciente riba e tema aki, urgiendo e paisnan pa tuma medida.
Mas di mita di e 150.000 morto pa aña di hobennan na e America lo por wordo preveni, e OPS a bisa, cual ta oficina regional di Organisacion Mundial di Salud (OMS), pa atribui un 24% di e fayecimento pa asesinato, 20% pa accidente di trafico y 7% pa persona cu a lesiona su mes.
E estudio, cu a abarca 48 pais y teritorio, a indica cu e mortalidad hubenil a baha levemente entre e aña 2000 y 2015 na America, unda 237 miyon di persona entre 10 y 24 aña ta representa e cuarta parti di e poblacion total.
Entre e 2004 y 2014, 72 miyon di persona a sali for di pobresa na America y nan a establece programanan di salud pa adolescentenan den mayoria di e paisnan. Pero entre 25 y 30 miyon di persona tin riesgo di bolbe bek den pobresa, hopi di nan ta hoben, e estudio a adverti, y ta inclui entre e gruponan mas vulnerabel e indjan, afrodescendiente, poblacion LGBTQ y hobennan migrante.
Sonja Caffe, asesor di OPS a splica, cu e mayoria di e fayecimento di e hobennan den e region ta produci entre 15 y 24 aña y ta afecta hopi mas pa e homber cu e muhenan.
