Un hecho cu tin mi persona sumamente preocupa y cu honestamente mi tin miedo di skirbi publicamente over ta cu Aruba su reserva monetario ta bahando desde 2022. E conclusion aki ta basa riba e rapportnan oficial di Banco Central di Aruba. Mi persona a alerta ambos MinPres, MinFin, MinEZ di aña pasa caba via comunicacion inoficial di Whatsapp, nunca a haya ningun forma di respuesta riba e mensahenan aki.

Aruba su economia supuestamente ta un motor v8 y toch reserva ta bahando.

En berdad turismo ta bayendo relativamente bon y si nos kere nos gobernantenan Aruba su economia ta bezig ta draai riba nivel record. Pero si nos analisa e rapport mas recien di Centrale Bank van Aruba, esta e “Press Release Monetary Policy Committee January 2024”, nos ta observa e grafico riba pagina 2, cu ta mustra duidelijk cu Aruba su “official reserves” (esta e linea geel) ta bahando desde medio 2022 caba. Tambe ta nota cu e linea geel ta sumamente cerca di e linea gestreep berde, cu ta indicando cu e reserva ta yegando un nivel relativamente preocupante. Laga mi bisa duidelijk cu esaki ta un grafico di CBA mes y no ta ningun calculacion of berekening di mi persona.

Kico lo pasa si inflacion global hisa of economia mundial slow?

Dus nos por nota cu nos reserva monetario ta bahando, esaki ta un hecho. Pero loke ta hopi espantoso ta cu relativamente economia global ta suppose “OK” ainda. Mi persona a adverti den diferente publicacion cu inflacion lo hisa y probablemente economia mundial lo slow significantemente. Kico lo pasa e ora cu e reserva monetario?

Aunke mi persona no lo bay specula publicamente over esaki, lo nota si, cu si e tendencia aki den Aruba su reserva monetario sigui, e lo posiblemente bin cu consecuencianan. Pero siguramente e no ta na su luga, pa mi persona specula over esaki. Ta gewoon nota un hecho cu e reserva monetario a baha terwijl cu economia di Aruba suppose ta draai bon.

Struisvogel Politiek

Loke ami ta wak cu ta e problema mas fundamental na Aruba ta, cu e “kader” di nos isla simplemente no ta dispuesto pa bisa e hechonan manera nan ta sin cu ta “sugarcoat” tur cos. Nos no ta dispuesto pa bisa cu edad di pensioen lo mester hisa por ehempel of cu premies di AZV lo mester hisa den futuro. Riba dje, ban no lubida e pakete Draconico ta wardando Aruba, esta e “Landspakket”, cu tambe por simplemente haya riba website di Rijksoverheid di Hulanda. Ta hopi medida ta na caminda.

Dicon nos no por simplemente bisa pueblo e berdad sin hunga Sinterklaas cu eigenlijk no por parti ningun regalo tampoco:

“Aruba ta den un situacion hopi hopi dificil, nos tur lo sinti e efectonan di esaki e añanan binidero. Tin luz na e fin di e tunnel si, danki na innovacion tecnologico. Hunto nos lo surpasa e retonan aki como pais aunke nan lo encera sacrificionan riba termino cortico.”