Recientemente nos a wak hopi noticia rond di Inteligencia Artificial (AI), te hasta cu Presidente Mericano, Donald Trump riba su di dos dia den funcion a anuncia un proyecto di AI di $500 biyon dollar.
Tambe nos ta wak cu casi tur siman tin sistemanan di AI mas y mas potente. Tur esaki ta trece nos na un tema cu ta un poco tabu: Kico lo hasi cu tur e trahadornan humano cual lo wordo reemplasa dor di AI? Esaki ta un pregunta cardinal cu nos como sociedad mester cuminsa pensa hopi bon over di dje.
AI ta miho cu ser humano den differente area caba
Den un rapport hopi amplio di banco di inversion Citigroup, nos por nota cu den diferente area AI ta miho cu ser humano caba. Notando e cantidadnan multi-biyonario cu ta wordo inverti den AI na e momentonan aki, nos por asumi cu e tendencia aki lo no solamente sigui, pero lo sigui den forma mas rapido den e añanan binidiero.
Di un banda nos mester prepara nos mercado laboral pa e cambionan radical aki y di otro banda nos como sociedad mester cuminsa pensa over e tema tabu aki di e consecuencianan di automatisacion.
Cua aspectonan laboral lo ta menos afecta door di AI?
Den e rapport “What Machines Can’t Master” di banco Citigroup ta papia di e tema di automatisacion y con pa prepara e mercado laboral riba e cambionan radical cu AI lo bay trece den e añanan binidiero. E analisis amplio aki a identifica varios habilidad humano cual lo ta mas dificil pa AI automatisa. Esakinan ta concentra riba aspectonan manera “empatia”, “comunicacion di humano pa humano” y “inteligencia emocional”.
E analisis aki ta indica cu ta hopi importante pa henter e mercado laboral cuminsa prepara pa e temporada unda AI por automatisa partinan grandi di labor actual. Esaki por wordo haci cu entre otro trainingnan amplio di esnan den e mercado laboral concentrando riba e set di habilidadnan menciona. E parti importante ta pa cuminsa prepara mas pronto cu ta posibel pa asina “no wordo soprendi” door di binidiero ola di automatisacion.
Preguntanan mas fundamental pa sociedad
Di otro banda tambe, automatisacion ta toca puntonan na un nivel mas fundamental pa sociedad. En berdad por train parti di e mercado laboral den set di habilidad cu ta mas dificil pa automatisa. Pero tambe obviamente lo keda partinan grandi di e mercado laboral cu simplemente lo wordo automatisa completamente.
Esaki ta toca e nucleo di e tabu di automatisacion. Kico nos lo hasi como sociedad pa esnan cu nan trabou a wordo automatisa y cu no por haya training pa habilidadnan mas sofistica? E tema aki ta uno cu henter pueblo y tambe nos ultra-kader politico, mester cuminsa enfrenta y por lo menos cuminsa pensa den manera profundo over di dje.
Mi persona hopi bes a toca e tema di “Universal Basic Income” (UBI) cu por wordo financia door di “Taxatie” di capitaal y en berdad negoshi basa riba Inteligencia Artificial. Aunke e tema aki di UBI pa hopi lector na Aruba y te hasta nos ultra-kader politico ta parce hopi radical, esaki no ta nada nobo pa denktanks grandi rond mundo.
Obviamente tin aspectonan socio-cultural y socio-economico sumamente complica y interconnecta si nos toca e tabu di automatisacion door di Inteligencia Artificial. E columna aki ta pa alerta pueblo di Aruba, pa nos por lo menos cuminsa pensa habri over e tema aki y con nos lo por brinda solucionnan duradero y socialmente husto. Den e contexto aki formation di maneho adecuado lo bay tuma su tempo, pero den tur esaki mester cuminsa prepara awe y kibra e tabu riba locual ta e binidero ola di automatisacion.
