Un poco prome di 7’or di mainta y ya caba Rudolfo Gonsalvez a lanta, baña, bisti su uniform, drecha su cama y prepara su desayuno; y tur esey, despues di a pasa e anochi prome compartiendo warda di vigilancia cu su colega di post den e mondi riba punta di Sero Crystal. Cu animo, el a comparti un poco di su experiencia positivo cu Formacion Social despues di haya un bishita y palabranan di estimulo for di Prome Minister Mike Eman diasabra mainta ultimo.
“Aki den nos tur a siña con pa traha cu otro, anto con pa confia otro; con pa reacciona ora nan traha hopi riba bo, paso nos tin acepta cu den bida lo tin hende manera hefe cu ta bay stress hopi riba bo, pero dor cu nos tabata jong, no ta nos tur tabata wanta esey,” asina Rudolfo ta reflexiona den su mesun palabra riba disciplina. El a siña tende di e Korporaalnan di Arumil cu ta dun’e ordo y ta bisa cu e sa “aunke nan ta streng, pero nan tin nan motibo dicon nan ta streng.”
Rudolfo ta admiti cu na cuminsamento no tabata di e facil ey, pero awo si ta bayendo miho dor cu nan ta scucha. Sin pensa dos biaha e ta contesta cu e si ta hopi contento di ta den Formacion Social y aunke e no tin un idea fiho ainda di con su futuro lo ta, e ta haciendo su best pa tin uno cu ta bon. “Loke ta haci mi mama contento, ta haci ami contento,” el a bisa.
Durante e ehercicio militar haci den e fin di siman tras di lomba, Rudolfo y otro 15 hoben di Grupo #11 mester a biba cu limitacionnan manera baña lihe y cu tiki awa, mescos cu drumi riba un mat den mondi, cual pe tabata e parti mas duro. Asina mes e ta wak cu claridad e proposito di e entrenamento aki. “E ta manera un wega, pero na mesun momento e ta siña bo ora cu bo traha y traha warda, pa no haci coy loco y ta prepara. Ayera a pasa full e post, tur hende a keda lanta y awe nos ta wak kico tin di nobo pa nos.”
Rudolfo ta bisa cu en berdad e fase militar, cual ta e prome cuater luna di e trayecto di un aña, ta mas pisa di loke el a pensa, pero cu e ta want’e pasobra e ta mentalmente cla, fisicamente cla y spiritualmente cla y nan ta haci nan best. Cada participante ta ayudo ya cu den e ekipo di instructornan di Formacion Social, ademas di militar, tambe tin Pastoor, docente, trahado social, entre otro guianan. “Tin biaha nan ta duro, pero tin biaha nan ta bin papia cu nos, mustra nos cu no ta duro so nan ta, cu nan tin un parti bon tambe,” Rudolfo ta conta sigurando su tras tambe cu e lo completa su trayecto y alcansa su diploma. “Te na final! Ami sigur, sigur, anto mi hendenan tambe paso mi no ta laga ningun bay cas.”
