E ta keda un reto pa importa carni di Colombia; Tanten cu e pais no por cumpli cu norma di Merca of Union Europeo

Minister di Salud Dangui Oduber tambe tin un papel pa hunga den habri e posibilidad pa importa carni for di Colombia. E Minister siman pasa a bisa Parlamento cu ta trahando riba e posibilidadnan aki.

Y riba pregunta di Bon Dia Aruba, e Minister a bisa cu tin hopi tempo ta pidi Gobierno pa amplia e posibilidad pa busca producto di consumo, particularmente carni, for di paisnan manera Colombia. Awor por unicamente for di Brazil y Argentina.

Motibo cu unicamente ta importa carni di Brazil y Argentina ta pasobra e paisnan aki ta cumpli cu e normanan di seguridad di cuminda mas halto posibel, cu ta esnan di Merca y Union Europeo. “Na Aruba nos tin nos ley, AB 1996 no. GT 4, cu ta e Slacht-en keuringsverordening,” Minister Oduber a bisa. E ley aki ta regla e normanan cu ta mara na e exigencianan di Merca y Union Europeo.

“Servicio Veterinario, encarga cu e ley, ta haya pregunta frecuente di nos turistanan Mericano, cu kier bin cu nan mes un producto paso nan ta preocupa di e siguridad di cuminda. Mas bien nan ta preocupa cu e siguridad di e productonan di animal manera carni. Nan ta keda trankilo ora cu ta informa nan cu na Aruba ta mantene e normanan di Merca y Union Europeo.”

Aruba a scoge pa solamente permiti entrada di carni cu ta aproba pa drenta Merca y Union Europeo, ya cu e productonan di carni aki ta keda regularmente controla, y riba aspectonan amplio conforme normanan halto. “Tumando na cuenta e falta di capacidad na Aruba pa haci e control continuo aki den laboratorionan a scoge pa solamente permiti importacion di carni cu ta aproba pa exporta pa Merca y Union Europeo. E paisnan manera Brazil y Argentina tin cierto ‘slachthuis’ cu ta produci carni cu ta aproba pa exporte na USA / EU y dus mag di keda importa na Aruba,” Minister Oduber a informa. “Na Colombia te aworaki no por a demostra cu tin ‘slachthuis’ cu ta produci carni cu e aprobacion ey. Pa e motibo ey, no ta permiti pa exporta carni di Colombia pa Merca ni Union Europeo.”

Segun e Minister, Gobierno ta evaluando diferente opcion pa resolve esaki pa Aruba. “Sinembargo y semper encuanto e carni mester por keda controla riba un base continuo y no periodicamente. E control mester lo ta riba aspectonan amplio manera e control di Merca y Union Europeo,” Dangui Oduber a bisa Bon Dia Aruba.