E storia di un migrante Venezolano: “Aruba ta ofrece un trankilidad social cu paisnan Latino Americano no ta ofrece”

No ta un secreto cu Venezuela ta pasando den un di e crisisnan migratorio mas grandi di e ultimo temponan. E condicionnan di bida na e pais pa hopi a bira insuficiente y insoportabel y p’sey, y hopi otro motibo, famianan completo ta tuma e dificil decision di bandona nan pais cu e speransa di busca un miho futuro pa nan y nan yiunan.

Den un entrevista cu Bon Dia Aruba. Z. Lizardo, Venezolano, ta conta con e hunto cu cas ay su famia a tuma e decision pa bandona Venezuela y bin busca un miho bida pa nan y nan yiunan.

Lizardo ta splica cu e decision di muda pa Aruba no tabata facil pa tuma, por lo menos pe, pa motibo cu aki ta maneha otro idioma(nan) cu su famia tabata maneha y e politicanan migratorio cu e isla tin pa evita e sobrepoblacion.

“Nos tabata wak e un poco imposibel na e momento ey, pero nos no tabatin otro opcion mas cu sali for di e pais, mirando e condicionnan politico, social, economico cu nos tabata pasando na e momentonan ey na Venezuela,” el a bisa.

Lizardo y su famia tabatin mas di 10 aña bishitando Aruba manera turista y pa nan e isla tabata brinda, apart di su cercania cu Venezuela, un trankilidad social cu e paisnan Latino Americano, manera Venezuela, no tabata ofrece y pe esaki ta un parti hopi importante cu su yiunan tabatin mester na e momento ey.

El a sigui conta cu nan tabata expuesto na hopi peliger politico of social cu nan a biba na Venezuela y cu su yiu mas grandi a wak. “Venezuela tin un crisis den tur factor y cu obviamente mi yiu tabata creciendo cu esey y e no tabata custuma na esey pasobra ora el a nace esey no tabata e situacion di tur dia di nos,” el a indica.

Tur esaki a hiba Lizardo y su casa tuma e decision definitivo di bin Aruba y awendia e ta sigur cu e tabata e decision corecto. El a agrega cu a pesar di e politicanan migratorio, nan a experimenta un pas social cu nan no tabatin na Venezuela. “Mi ta kere cu paz no tin prijs,” el a remarca.

“Mi yiunan ta trankil, sobretodo mi yiu grandi cu ta esun cu a wak y a biba un poco di e crisis, y aworaki e ta trankil, e ta biba na paz sin wak e problemanan di no tin gasolin, di no tin transport, di no tin coriente, di no tin awa pa bebe of pa laba paña. Si no cu e ta wak otro realidad y cu trabao nos por sali bay dilanti. Cos cu na Venezuela no tabata posibel pasobra nos no por a sali pa dilanti cu e trabao cu nos tabatin, e no tabata suficiente,” Lizardo a enfatisa.

El a ratifica cu e oportunidadnan cu e muchanan tin aki na Aruba, Venezuela no por ofrece, den e sentido di desaroyo di otro idiomanan, tin otro experiencianan.

Mas leu di e oportunidadnan academico, un di e cosnan mas importante pa Lizardo, of esun mas importante ta e derecho na bida y na Venezuela nan no tabatin esey. “Awendia si nan tin’e aki na Aruba. A pesar cu nan no tin un seguro medico, nan tin acceso na salud, nan por haya e medicamentonan, nan por gosa di electricidad, di awa, di cuminda y tur e cosnan ey cu tabata dificil y casi imposibel y cu awendia e isla ta brindando nan. Aunke hopi tiki ta balora e tipo di cosnan ey of situacionnan asina, mi ta kere pa nos como famia migrante e ta hopi importante,” el a subraya.

Por ultimo el a resalta cu a pesar cu Venezuela ta su pais natal y cu el a logra un carera universitario y cu e tabatin un trabao di 11 aña y su casa cu un trabao di 13 aña, e pais no tabata brinda nan e posibilidad di duna nan yiunan e elementonan di superacion esencial pa nan.