Sr. Mario Carrera ta un artista local cu ta involucra den e mundo di arte pa un poco mas di 10 aña caba. Den un entrevista cu Bon Dia Aruba, Maria a conta su storia, bida y milager cu a yud’e desaroya su don artistico te na e punto cu awe e ta celebra su di dos exposicion di arte.

Mario a drenta den e mundo di arte door di un accidente cu el a sufri na 2009. Un accidente cu a cambia su bida, su forma di pensa y introducie no solamente na e mundo di arte, pero tambe e acerk’e na Dios.

El a conta cu el a bay yuda un amigo di dje cu e tabata yuda tur weekend na su cas pa traha un camber chikito pa su yiu muhe. E momento a yega pa cuminsa pone dak nobo y poniendo e dak, esaki a kibra cu Mario riba dje.

“Mi no por a wanta niun caminda. E accident a pasa asina lihe y un cera di wowo y ayo. Mi a cay riba un vloer di beton y eynan mi a fractura cuater disco. Dokter a declara mi paralitico pa semper. Mi a yora, gana di muri y nada mas,” el a bisa.

Tabata temponan cu Mario no tabata kier sa nada di nada. Un tanta na Venezuela tabata bis’e pa e lesa un oracion, pero el a coy e papel y a pone un banda pasobra e no tabata kier nada cu Dios y nada cu niun hende. Un anochi el a coy y e papel pa wak e oracion y el cuminsa lesa y asina el a haci e oracion tres dia y tres anochi.

Un dia durante su fysiotherapie el a bisa e fisioterapista cu e ta bay cana, pero e fisioterapista no a kere cu e ta bay cana pasobra dokter a bis’e cu e no lo por cana nunca mas. Mario a pidi pa e bisti un korset pa e purba cana, y dokter a bis’e cu ta su responsabilidad pasobra e no por cana.

Mario ta conta cu den su mente e tabata bisa cu e ta bay cana. Nan a yud’e lanta for di cama y a dal su prome stap. “E dokter hefe di piso a bin y a puntra mi ki mi ta haci, mi a bis’e cana. El a bisa mi cu mi no por cana, ken a bisa cu mi por cana? Mi a bis’e Papa Dios.”

For di eynan el a cuminsa siña cana manera mucha chikito y despues di un aña un dokter di Hulanda a wak e y a mand’e Colombia. Mario hunto cu su yiu homber a yega Bogota y dokter a wak e y check tur cos, pero dokter a bis’e cu e no por haci nada mas p’e. Un noticia cu a dal Mario hopi duro.

Pero dokter a bis’e tin un Plan B, cual tabata pone schroefnan grandi y plachinan di hero den su lomba, cual el a acepta. E fecha di e operacion tabata 3 di october 2010, cual tabata exactamente un aña despues di su accidente, cual a tuma lugar dia 3 di october 2009.

El a cuminsa siña cana atrobe cu kruk. Na Colombia, un dia el a bay misa pa gradici Dios y den e misa el a cana bay te dilanti pastoor sin kruk y a pastoor a bis’e cu e tabata un milager.

Despues cu Mario a bin Aruba, su señora a cumpra potlood, papel y verf pa e cuminsa pinta pa yud’e cu su stress.

“Eynan mi a cuminsa pinta poco poco. Mi señora tabata yuda mi, duna mi idea. Mi a saca 150 potret di casitanan perdi rond di Aruba pa mi a pinta. Mi a cuminsa pinta y mi a pinta 47 y asina mi a haci mi prome exposicion na aña 2013,” Mario a conta.

Despues di esey el a dicidi cu e ta bay sigui cu su arte y eynan a drenta e meta pa e pinta pa piscadonan door cu e tambe tabata un piscado y e sa con duro e piscadonan ta traha y e botonan ta hopi bunita y lama tambe ta hopi bunita pa pinta.

Actualmente e ta bay haci 10 aña cu e no a haci un exposicion, te aworaki cu e ta bay hacie atrobe. “Nan ta bisa tur cos tin su tempo. Mi tempo ta tempo di Dios,” el a resalta.

Mario ta un adulto mayor, pero esaki, el a enfatisa, no ta un motibo pa stop di siña y crece. “No ta pasobra nos ta adulto mayor y ta cobra pensioen ya nos a caba. No, nos tin cu siña, nos tin cos pa haci, si bo tin un meta traha riba dje cortico, pero bon y keda purba. Ami ta purba tur manualidad cu mi haya riba YouTube, tur mi ta pasa curso di nan y mi ta siña tur cos,” el a remarca.

Mario ta drecha e imagennan tambe pa misa di Noord, e tin seis aña trahando pesebre di material recicla pa december, e ta traha tambe manualidadnan di man, cadena, armband, rosario y mas, un don cu el desaroya despues di su accidente.

“Un don ta aclaria bo mente. Tur dia mi ta lanta cu mente positivo y tur dia mi ta sinta pa traha mi ta pidi un bendicion di Papa Dios pa e guia mi, mustra mi kico mi tin cu haci. Casi tur dia mi tin algo di haci,” el a agrega.

Mario ta conta cu su dolor ta 24 ora pa dia, un efecto cu el a keda cune. Door di esaki e tin un pomp di morfina y tur dia e tin cu usa e pomp, na dosis chikito. Pero ora e dolor bira di mas, e ta bay hospital.

El a conta cu den hospital el a conoce hopi hoben cu pa motibo di accidente cu brommer a perde pia. Di experiencia propio e tin un mensahe special pa e hobennan den situacionnan aki y cualkier otro persona cu ta pasa den dificultad.

“Sinti bo mes prome, conoce bo mes prome, hopi oracion, e ta yuda, kere den Dios y pone un meta. Purba pa wak kico bo por, kico bo kier, unda bo kier bay, unda bo kier yega, tur esey bo mester pone den bo cabez y bo ta bay pa dilanti, bo ta sigui pa dilanti. No ta bunita bo ta laga bo bida bay asina, bo a traha hopi duro caba, pero nos tin nos bida y nos tin cu sigui pa dilanti.”

Mario su exposicion di arte dedica na piscadonan di Aruba ta tuma luga awe na UNOCA for di 7or pa 9or di anochi. Durante e exposicion Mario lo entrega tres piscado baluarte un reconocemento pa nan trabao duro, un premio cu Mario mes a traha. E exposicion lo keda habri durante un luna na UNOCA.

Por ultimo Mario ta gradici su padrino Sr. Dufi Kock, y su señora Ija, cu ta yud’e cu potret di piscadonan y di Aruba su antaño, Sr. Irine Pieterson, Unoca y su sponsornan y sin lubida su señora Luzmery, “mi Fortaleza den tur cos di mi bida.”