Ayera minister di Financia, Angel Bermudez a declara na Bon Dia Aruba cu basicamente e disgusto di cuerpo di duana ta riba polemica di e trabou di renobacion cu ta tumando luga den e sala di yegada di aeropuerto.  

E mandatario no ta kere cu e tipo di accion cu personal di departamento di Aduana representa pa sindicato SADA a tene ayera dilanti di aeropuerto, lo contribui na un solucion. “E solucion ta cu nos mester sinta manera hendenan madura na mesa; y delibera y argumenta con pa yega na un solucion”, segun minister Bermudez.

E mandatario a informa na e matutino aki cu nan ta spera cu mas tarda otro siman nan lo por yega na un solucion definitivo. Ya caba di parti di Triple A, e director sr. James Fazio a duna di su banda caba, paralisando temporalmente e trabou di renobacion  for di ayera merdia te cu diaranson, pa asina duna espacio pa un comision asigna lo por sinta dialuna y diamars pa mira con nan por yega na un  solucion practico.

“Mi ta kere cu esey ta loke nos mester. Y mi ta spera berdad cu tur hende, tur partido, y tur banda lo sa di mustra nan madurez y inteligencia pa asina ey nos por sigui traha na bienestar di Aruba y na bienestar di nos turismo”, asina el a laga sa.

Minister  responsabel di Departamento di Aduana, a indica cu mester tene cuenta cu aeropuerto tin su parti aden, unda  cuerpo uniforma di Aduana mester funciona. Pero aeropuerto ta un facilidad naturalmente pa nos biaheronan, y muy particularmente pa nos turistanan cu ta bin di afo tur dia, y cu Tiple A lo kier acomoda mas miho posibel. Pero tambe brindando na e bishitantenan e procedura mas moderno y efectivo di dos departamento di gobierno cu ta inmigracion y aduana.

Localidad pa personal di aduana
El a splica cu specificamente e trabou di renobacion ta e sitio cu tabata wordo reserva pa  pone e carosa grandi di Carnaval y unda tabatin un stage tambe pa grupo  musical toca, banda di oficina di Aduana. E espacio ey, aeropuerto kier clausura y pone varios lokaal pa car rental pa asina facilita e pasaheronan cu kier haci uzo di un car rental na Aruba.

E mandatario a bisa cu e oficinanan aki lo ta parti pafo y totalmente separa di e area caminda Aduana mester haci su trabou.  Tambe e parti unda Aduana ta funcionando na aeropuerto lo wordo modernisa y lo bin entre otro scan mashin nobo, segun el a declara na Bon Dia Aruba. Minister Bemudez a indica cu Duana su seccion na aeropuerto lo haya un espacio mas efectivo na luga di e unico luga cu nan ta uzando aworaki y cu un scan mashin so, ya cu no tin mas di e scannan  aki cu ta funciona bon na aeropuerto.

E mandatario ta haya cu un pregunta cu tin su validez ta: Ken ta dicidi con ta construi e area ey den aeropuerto mes?. Ya cu Triple A ta esun cu ta administra aeropuerto cu kier haci e renobacion aki, segun nan plannan y nan vision. “Of e cuerpo di Duana den e caso aki SADA, ta esun cu por haci of dicidi con esey lo mester sosode?”  Minister Bermudez ta kere cu esaki ta e pregunta principal  entre ambos partido.

Comision y deliberacion
E mandatario a bisa cu pa casi un aña caba, nan ta deliberando riba e topico aki. For di 2015 –segun e minister- nan a  bay di acuerdo pa e renobacion tuma luga; y pa yega den e compartimento di e localidadnan mas den detaye, a wordo instala un comision mixto.

E comision aki integra pa directiva di Aduana pero tambe di DOW, Triple A cu participacion di  SADA tambe, a delibera entre nan y bin cu conseho riba e trabou di renobacion cu ta tumando luga den e area di yegada di aeropuerto. Pero tambe e comision aki a evalua e situacion di edificio di duana na boulevard cu a deteriora, caminda nan mester muda e departamento aki.  Igualmente miembronan di e comision aki ta evaluando riba e edificio nobo di Aduana cu mester bin  na Barcadera.

Sinembargo encuanto e comision y su tarea pa loke ta  nan conseho pa e renobacion di e area di yegada na aeropuerto, aparentemente nan no por a yega na un consenso of acuerdo riba e parti aki. Y esaki ta  keda refleha den e descontento cu personal di Aduana representa  pa  SADA tin  y nan a bin cu accion pa expresa nan malcontento bandonando nan pia di trabou pa bay pafo di aeropuerto.