E Solo Foundation ta un fundacion cu tin como meta yuda combati obesidad bao di mucha- y hobennan di Aruba den scol basico. Nan obhetivo ta pa yuda e mucha- y hobennan aki biba un bida mas saludable trahando conhuntamente cu nan mayornan pa yega na un peso saludable.
Cool2BFit ta un di e programanan di e fundacion cu ta enfoca ariba e mucha y hoben, y su mayornan. Dietista, fisioterapista y cientifico di comportamento ta traha pa yuda famianan come mas saludable y haci mas movecion.
A traves di nan pagina di Facebook, DVG, partner di E Solo Foundation, a publica cu cada aña tin un grupo chikito cu ta participa na e programa Cool2BFit y e aña aki Sint Dominicus College ta di cuater grupo di mucha y mayor cu a pasa den e asina yama Fase Intensivo di e programa.
A tene un ceremonia chikito pa clausura di e prome fase aki y aworaki e grupo lo pasa pa e fase di deporte. E programa total ta dura 18 luna.
E team cu ta guia e muchanan ta consisti di Swinda Dumfries (DVG, orthopedagoog), Ebrina Curet (DVG, voedingsdeskundige), Kevin Regales (docente di gym), Juritza de Cuba (psicologo), Stephen Helmeyer (fysiotherapeut) y coordinador di e programa Miriam Baiz.
“Un danki grandi di curason pa e muchanan y e mayornan, cabesante y team Sint Dominicus College, team E Solo, pa boso perseverancia y dedicacion,” e presidente di E Solo Foundation a bisa.
