Minister di Transporte, Integridad, Naturalesa y Asuntonan di Adulto Mayor riba su rednan oficial a informa cu a cuminsa un proceso unda e siman aki lo publica e ‘blueprint’ pa loke ta trata e redireccin di desperdicio, unda lo contesta e pregunta cardinal “unda lo tira e sushi ora Parkietenbos lo cera dia 31 di december di e aña aki?”

Mediante un comunicado di ‘Trash to Cash’ a informa cu “den transcurso di e aña nos a bin ta desaroya loke a bira e fundeshi di e vision pa restructura e maneho di desperdicio na Aruba. Cu e 10 principionan aki, nos ta canando e caminda pa finalmente cera Dump di Parkietenbos. E proceso a cuminsa!”

E siman aki lo publica e blueprint pa loke ta trata e redireccion di desperdicio. Esaki lo contesta e pregunta cardinal cu hopi tin di loke ta trata: “unda lo tira sushi ora Parkietenbos cera?”

10 principio pa Maneho di Desperdicio
 1. Gobierno no ta doño di bo sushi.
2. Dump habri y kimamento den aire liber no lo ser tolera.
3. Cera Dump di Parkietenbos ta posibel mientras ta mehora (infra)structura di desperdicio.
4. Tur compania di procesa desperdicio ta bon bini den e industria.
5. Sanitary landfill – ta un paso den e bon direccion a corto plaso.
6. Rol di gobierno lo ta pa organisa un sector robusto di desperdicio for di un perspectiva di cadena di balor (Value-Chain Perspective).
7. Restructuracion di Aruba su maneho di desperdicio lo ser basa riba principionan duradero.
8. Regulacion y control lo forma parti integral den e maneho di desperdicio.
9. Cada persona, cas of negoshi ta (financieramente) responsabel pa mantencion di su area di deposita desperdicio.
10. Aruba lo ser guia pa e “Waste Hierarchy”(UNEP, 2018) pa haci e transicion pa un economia mas circular.

Un blueprint ta un descripcion mas detaya di cada etapa di prestacion di un servicio, ora ta realisa un blueprint ta analisa e proceso di manera integral sin importa e areanan cu ta realisa e tareanan, ta cuminsa pa compronde ki etapa e proceso tin, cuanto punto di contacto tin y ki actividadnan e compania ta haci, tanto di esun cu e cliente ta wak como esun no ta wak.

Den edicion di Bon Dia Aruba di 5 di december ultimo, minister Arends a señala cu su vision ta pa lo transforma e dump den un Parke Solar, pero e proceso di analisis y evaluacion ta andando. “E proceso di analisis cu ta andando ta pa fiha cual ta e miho forma y esun mas sigur pa tanto hende como naturalesa y medio ambiente. Esaki tambe lo bay via un openbare aanbesteding pa e forma. Mester analisa cada estudio debidamente pa asina por scoge un solucion duradero y pagabel”, el a bisa.

Potretnan di archivo.