E siman aki, Comision di Retiro ta reanuda nan trabaonan y cuminsa atende e peticionnan cu a keda stagna varios luna pa asina cuminsa cumpli cu e sentencia di hues riba e caso Romar Trading versus Gobierno di Aruba.

Dirigentenan di FTA cu ta e sindicato cu ta representa mayoria di e trahadonan di sector priva ta reuniendo cu e Comision di Retiro di departamento di Labor (DAO). E reunion aki ta tumando luga despues di e veredicto cu hues a duna, esta cu gobierno no por nenga di acepta solicitud di retiro pa asina DAO procesa y evalua nan. Nan ta evaluando e procedura pa e peticion di retiro no tarda mas cu dos luna y mey.

Presidente di FTA, Hubert Dirksz a declara na Bon Dia Aruba cu nan ta reuniendo cu e Comision di Retiro representa pa tres representante di e dunado di trabao, tres representante di e sindicatonan, hunto cu funcionarionan di DAO y ministerio di Labor pa medio di nan conseheronan.

Actualmente nan ta bezig dialogando y analisando full e procedura, con e Comision di Retiro ta funciona. A pesar cu tin impresion cu e proceso aki ta tardando, presidente di FTA a bisa cu mas bien e meta ta pa haci e proceso mas lihe, pero mas eficiente tambe. Ya caba nan ta yegando na acuerdonan pa tur partido envolvi mester por funciona miho.

Di un banda dunado di trabao ta haci peticion pa haya permiso pa retiro. Mientras DAO cu ta e parti di secretariado, guia y procesa e solicitud di retiro, mester ta mas diligente. Y nan Comision di Labor mester por tambe haci su trabao mas miho posibel. “E ora ey bo por tin decisionnan mas lihe. Pasobra e comision ta haya tur documento mas lihe,” el a bisa.

E ta haya cu den e caso aki, te hasta e trahado mes cu ta envolvi den e peticion pa termina su relacion di trabao cune, como trahado e tin cierto derechonan. Pero e tambe mester por wordo guia di parti di DAO pa e por defende su mes miho. Unabes cu e director di e compania cu ta haya e conseho for di Comision di Retiro, nan por tuma un decision final hopi mas lihe.

Pero FTA ta kere cu bao niun circunstancia no mester permiti un ‘economia ta draai ariba inhusticia tampoco.” Pero loke si nan ta considera importante -segun e sindicalista en cuestion- y no obstante e proposicion di e dunado di trabao, cu FTA ta dispuesto pa bay den dialogo. Pasobra por ehempel haci peticion na DAO dor di Comision di Retiro pa duna un conseho na fabor of contra pa director di un compania tuma un decision di retiro, e ta algo cu por keda y mester keda. Esaki no ta kita cu e procedura por tuma luga di un forma mas lihe y eficiente.

E ta haya cu e procedura no mester ta asina cu ta bay dura tres of cuater luna of te hasta mas. Sino cu e mester dura seis siman of maximo dos luna y mey cu un peticion di retiro mester por a keda cla, ya sea na fabor of contra, asina presidente di FTA a declara. Pa logra esaki no ta necesario cambia e ley. Solamente mester diligencia e maneho sin tin necesidad pa cambia e ley. E ta un punto cu logicamente nan mester evalua pa conhuntamente tuma un decision, el a bisa.

Den e agenda cu nan ta maneha den e seno di e reunionnan di Comision di Retiro tin un tipo di deadline. Nan a bisa cu ya caba nan ta discuti e puntonan concerni locual a produci un documento ariba dje.

DAO y ministerio di Labor a traha riba dje, y tanto dunadonan di trabao y sindicatonan a wordo informa, caminda cada un di nan ta duna nan feedback. Tin aspecto legal cu logicamente mester tene na consideracion y cu mester cambia, pero e lo por tarda un poco, pero tanten decisionnan a wordo tuma caba.

E ta kere cu e trabao mes pa bin full cu e cambionan cu nan kier, no ta keda cla ainda. Pero si e Comision di Retiro ta cuminsa traha e siman aki, y tur e cambionan cu nan a haci delanta durante nan reunionnan, lo tuma luga rapido.

Reunion Tripartiet

Presidente di FTA a referi riba e reunion Tripartiet cu mester tuma luga pa atende cu varios asunto, entre otro di flexibilidad laboral.

Sindicalista Dirksz a bisa cu nan tin un comision caminda gobierno a pone cu nan ta bay uza e structura di dialogo cu a wordo estableci pa medio di e modelo di Organisacion Internacional di Labor (ILO).

Tur statuut di e congreso a wordo aproba na nivel tripartiet. Loke ta keda pa atende cune ta e diferente puntonan di interes di e partidonan, esta dunadonan di trabao, sindicatonan y Gobierno. Pero Covid-19 a bati nos porta y tin varios punto pendiente pa atende. Un di nan cu a drenta ta esun di flexibilisacion di ley laboral cu ta un peticion haci pa e dunadonan di trabao.

E punto aki a bay Hulanda, caminda nan a propone pa e tema di flexibilisacion laboral ta bira un di e condicionnan of reforma cu lo tuma luga den e landspakket. FTA ta compronde cu gobierno a acorda cu Hulanda cu e punto specifico aki -contrario na e diferente puntonan di e landspakket- lo wordo discuti y trata na nivel tripartiet.

Nan a cuminsa atende cu e prome punto cu ta relaciona cu e Comision di Retiro. Pero tambe tin e proposicion di dunado di trabao pa atende cu otro punto, manera eliminacion di ley 1613X. Ta conoci cu sindicato FTA y otro sindicato ta contra di eliminacion di e ley. Nan ta haya por ehempel cu e cambio riba tempo di duracion durante periodo di prueba no ta necesario.

Segun sindicalista Dirksz, e hecho cu nan por ta contra, esaki no kiermen cu tin puntonan cu mester di nan debido atencion. Proximamente ta bin tin un reunion bipartiet entre sindicatonan y gobierno. El a trece dilanti cu tanto gobierno y tambe dunado di trabao, pero sindicatonan mester tin nan posicion pa bay den congreso riba e decision cu mester wordo tuma y kico e cambionan ta bay ta. Na medida cu tin cambio, nan ta bira parti di e landspakket hunto cu e otro cambionan di e reforma nan promovi pa Hulanda.