Director di WEB, Luis Oduber a informa na Bon Dia Aruba cu e retraso cu a presenta den e suministro di combustibel tabatin di haber cu un cargamento cu tabata cla pa yega Aruba pero e calidad no tabata esun miho, ya cu e lo por ocasiona daño na nan planta. A base di esey nan a pidi pa cambia e combustibel locual a ocasiona un retraso di e suministro.
Oduber a bisa cu e no tin di haber cu placa, ya cu loke “nan a wordo informa ta cu tin un barco cu a yega of cu ta yegando, pero cu e calidad di e fuel abordo por ta dañino pa nos ekiponan”. Pa atende e asunto aki WEB a traha cu FMSA pa traha un plan di contingencia, caminda internamente nan a haci cierto adaptacion. Pero ya caba e combustibel a yega e siman aki locual e capitulo aki ta practicamente cera.
Oduber a bisa cu nan ta purba di ta mas habri pa comunidad pasobra nan ta realisa cu nan ta un compania estatal di pais Aruba. “Nos mester tin niun secreto. Naturalmente semper tin detaye cu nos no por share asina mas, pero porta ta habri pa duna informacion ora cu ta necesario”, el a bisa. Nan ta prefera cu ora cu tin pregunta ta acerca PR di WEB pa haya e contesta corecto y evita speculacion cu tin biaha ta crea un preocupacion innecesario.
Director di WEB a referi na e echo di e publicacion di e suministro di combustibel fuel oil cu a confronta contratiempo pa yega Aruba y abastece nos planta productor di awa y coriente. Oduber a indica cu no tabatin necesidad pa bay den panico, pasobra e situacion a wordo controla conhuntamente cu FMSA. Si den dado momento WEB como compania responsabel di suministra awa y coriente ta bin ripara cu tin un peliger, nan lo comunica esaki debidamente, segun Oduber.
Suministro di combustibel
E combustibel aki ta bin for di diferente parti, ya sea for di Curoil na Corsou, pero tambe for di St. Eutanasia, Trinidad , etc.. Ta depende for di unda Citgo mes ta cumpr’e pa facilita na e suministrado di WEB cu ta FMSA (Fuels Marketing & Supply Aruba). E suministro aki ta tuma luga alrededor di cada tres luna y e ta un cargamento di mas of menos 300 mil bari di fuel oil. E planta di WEB ta practicamente 80% pa 90% dependiente di fuel oil (HFO), y esun cu ta abastece nan di combustibel ta e compania nobo FMSA. E ta un cadena di suministro, ya cu FMSA ta ricibi e combustibel via Citgo, ya cu den pasado semper tabata cu Valero bou e compania VMSA.
Encuanto e proyecto di gas pa nos planta lo ta menos dependiente di fuel oil ta den e proceso “bayendo mas profundo” den dje, segun Oduber. El a agrega cu nan ta evalua nan proyecto na nivel prome superficial y awor nan ta bayendo mas profundo y detaya. Nan ta trahando hunto cu Utilities y Gas Unit pa explora posibilidad pa bin cu e gas via barco. Tambe nan ta wardando si operador di e refineria lo bin cu entrega di gas via pipa y asina compara e prijs pa wak kico ta mas bentahoso pa WEB y naturalmente pa Aruba.
Polisa di compromiso
Encuanto si ta existi un polisa cu ora cu tin fayo di FMSA pa cumpli na tempo cu e suministro di combustibel , e compania aki cu ta cay bou e mesun dak di Refineria di Aruba (RdA), lo para responsabel di cualkier gasto extra of consecuencianan. Oduber a laga sa cu actualmente nan ta den proceso di yega na un contract cu FMSA pa loke ta entrega di combustibel.
Ya den pasado WEB tabatin contract cu Valero, mientras cu FMSA ta practicamente cu a keda institui recientemente. Logicamente FMSA tambe tin su contract cu Citgo kende a su bes tin tambe contract cu un suministrado di e producto HFO of fuel oil. Cada empresa cu ta forma parti di e cadena di suministro tin su seguro cu lo para responsabel pa cualkier falta di cumplimento.
E rol di Citgo den e cadena di abastecemento di fuel oil pa WEB ta esun di suministrado di e combustibel HFO pa FMSA. Ya cu unabes cu e combustibel ta yega na Aruba, FMSA ta responsabel di pomp e combustibel aki te hasta e planta di WEB. Ya cu e parti di infrastructura unda e barco carga cu e combustibel ta yega y e pipa; y demas infrastructura pa pomp e fuel oil pa WEB ta di RdA, cu tambe ta wordo lease na Citgo. Oduber no tin mucho detaye con e contract entre nan mes ta, pero si tur infrastructura ta di RdA. Pero WEB ta deal cu FMSA cu ta cay bou e mesun dak di RdA.
