Natural Bridge, ubica entre e mina di oro na Bushiribana y beach di Andicuri, tabata un di e atraccionnan mas famoso y mas fotografia na Aruba, prome cu su collapse repentino dia 2 di september 2005.
E brug, cual tabata e brug mas grandi di su tipo den Caribe, tabata 7.6 meter halto y 30 meter largo. E tempo aya, minister di Turismo Edison Briesen a bisa cu e causa di e collapse no tabata inmediatamente conoci. Sinembargo, a nota un crack na un banda di e brug varios aña prome.
“Ta un dia hopi tristo pa Aruba y su turismo,” Briesen a bisa e tempo ey. “Un potret di e brug ta aparece na casi tur flyer promocional, y mas turista ta bishit’e cu cualkier otro atraccion.”
Cantidad di local y bishitante a bay mira loke a resta di loke antes tabata un tesoro nacional. E brug tabata un formacion di coral limestone, corta pa miles di aña di ola y biento fuerte. Centenares di bishitante y local tabata cana riba dje cada aña.
E bon noticia ta cu Aruba tin varios otro brug natural, maske algun ta dificil pa alcansa, incluyendo uno chikito banda di esun cu a collapse.
