E Soca Prefinals di Aruba Caiso & Soca Monarch (ACSM) lo tuma lugar riba dia 7, 8, 9 y 10 di november 2023. Riba cada anochi, cinco diferente banda lo participa den e subcategorianan “Groovy Roadmarch” y “Power Roadmarch”. Publico lo por sigui e Soca Prefinals for di comodidad di nan cas of hunto cu grupo di amigo, famia y colega. Tambe lo tin oportunidad pa apoya nan banda y cantante preferi na The Venue, na unda e Soca Prefinals lo tuma lugar.
E transmision na television via canal 23 (Nos Isla TV) y e online streaming, lo ta completamente gratis y disponibel mundialmente via e Facebook page y YouTube channel di Stichting Musica, Elite Studios y Telearuba. Publico cu lo kier asisti na The Venue, lo mester ricibi un “wristband” for di e banda nan of cantante nan cu ta participa na e festival. Tambe, por gana entrada pa e Soca Prefinals pa medio di diferente rifa riba e Facebook page di Stichting Musica y a traves di varios radio emisora entre 30 di october – 6 di november 2023.
Riba diaranson, 25 di october 2023, lidernan di banda y participantenan a bin hunto pa un anochi masha ameno na Neighba na San Nicolas. E restaurant a parti un variacion di snacks Caribense entre e invitadonan y varios agrupacion a yega na e sitio den un forma espectacular. Por ehempel, Shine Music a haci nan entrada cu limousine, DLS a yega riba brommer, e elenco di Tsunami tabata bisti na blanco y a drenta cu bandera di e banda y varios musico a bin bisti pa impresiona, e.o. Papi Jones di The Crew.
Ta mustra cu e bandanan y cantantenan ta bon prepara pa e Soca Prefinals venidero y durante di e anochi nan cada un a “trek lot” pa haya sa e secuencia di banda pa cada anochi. Esaki ta e resultado oficial di e trekmento di lot:
Soca Prefinals Day 1 – Diamars, 7 di november 2023:
Banda nr. 1 – Good Times Band
Banda nr. 2 – The Crew
Banda nr. 3 – Musical Time
Banda nr. 4 – DLS
Banda nr. 5 – Zeta Band
Soca Prefinals Day 2 – Diaranson, 8 di november 2023:
Banda nr. 1 – Shine Music
Banda nr. 2 – YX3M
Banda nr. 3 – Sunrise City Players
Banda nr. 4 – ‘N Fuzion
Banda nr. 5 – X-Static
Soca Prefinals Day 3 – Diahuebs, 9 di november 2023:
Banda nr. 1 – Suona
Banda nr. 2 – Impak
Banda nr. 3 – Hot Ones Band
Banda nr. 4 – Buleria
Banda nr. 5 – D’Islanderz
Soca Prefinals Day 4 – Diabierna, 10 di november 2023:
Banda nr. 1 – Tsunami
Banda nr. 2 – Duro Entertainment
Banda nr. 3 – Phenomenon
Banda nr. 4 – Caribbean Band
Banda nr. 5 – Noush & The Band
Stichting Musica ta invita un y tur pa Like y Follow e Facebook page di Stichting Musica pa keda na altura di tur desaroyo relata na ACSM2024 y tambe pa por gana entrada pa e Soca Prefinals di dia 7 – 10 di november 2023.
E organisacion ta agradecido pa e apoyo y sosten ricibi di Setar NV, Aruba Airport Authority, Elite Productions & Entertainment y Telearuba y e presencia di e team di SMAC. Tambe, pa e compromiso cu Aruba Bank NV a haci na nos talentonan musical. Aruba Bank a duna di conoce cu e concepto nobo y innovativo di e festival ta netamente loke a atrae nan pa forma parti di ACSM un biaha mas y a desea tur participante di ACSM2024 tur clase di exito.
