Corsou no ta e unico isla den reino Hulandes cu a cera muchanan migrante menor di edad (vreemdelingenbewaring) ilegalmente. Aruba tin un secreto cu a keda scondi pa basta tempo, pero awor Bon Dia Aruba a haya e informacion aki.

Mirando e importancia cu e topico aki tin pa cual mester informa comunidad, den e articulo aki ta bay ilustra con e anterior director di Guarda Nos Costa (GNC), Richard Kramers y ex-minister di Husticia, Andin Bikker kende tabata forma parti di Gabinete Wever-Croes I, a cera tres mucha menor di 12,14 y 17 aña di edad den instalacion di Guarda Nos Costa na FOL contra ley.

Secuencia di e proceso

Segun e orden hudicial (bevelschrift) di dia 22 di augustus 2020, minister di Husticia y Seguridad, Andin Bikker a duna orden pa e mama di e tres menor di edad keda den detencion na Guarda Nos Costa.

E mesun dia, e mama di e muchanan a haya un meldingsplicht (met werkverbod); dia 31 di augustus 2020 pa 4:30pm nan ta bolbe detene e mama di e tres menor di edad.

Pa 2 di september 2020, e mama ta presenta dilanti hues comisario M. Soffers pa determina si e detencion tabata den cuadro di ley.

Sentencia di Hues Comisario Soffers

Pa sorpresa di hues comisario, na e momento ey el a haya sa cu e tres mucha menor di edad tambe tabata den detencion hunto cu nan mama na FOL. E no tabata na haltura di esaki antes, pa motibo cu e orden di detencion cu a presenta na hues comisario tabata dirigi na e mama so, no na e muchanan. Sinembargo, na e momento ey, hues a haya sa cu e muchanan tambe tabata cerca hunto cu nan mama.

Durante e tratamento di e caso, director e tempo ey, Richard Kramers a bisa hues comisario cu e decision di bin cu e muchanan na Guarda Nos Costa tabata den consulta cu Voogdijraad pa interes di e muchanan, y segun e ex-director a señala, e muchanan no tabatin cuminda ni luga pa drumi.

Den tratamento tambe, e ex-director a purba di hustifica na hues cu “no por papia di un detencion of di privacion di libertad pasobra e muchanan por a cana libremente paden den edificio di Guarda Nos Costa na FOL.”

Na dado momento e hues comisario no por a sigui scucha e argumentonan di e ex-director di Guarda Nos Costa mas, y hues a draai y splik’e cu “na e momentonan aki cu e muchanan no por sali for di e instalacionnan di Guarda Nos Costa, legalmente nos ta papiando di privacion di libertad pa locual ta rekeri di un base legal.”

“Nu de minderjarigen GNC niet kunnen verlaten is er sprake is van vrijheidsbeneming waarvoor een wettelijke grondslag nodig is.”

Pa motibo cu ni GNC ni minister di Husticia no tabatin un base huridico y un bevel di inbewaringstelling cu cual mester a cera e muchanan na GNC, privacion di libertad di muchanan ta totalmente contra tur ley, hues comisario a duna orden pa e libertad di inmediato na e tres mucha menor di edad.

Odisea di e muchanan den GNC

Segun un fuente interno di Guarda Nos Costa, e tres menor di 12,14 y 17 aña a keda cera den cel y mester a sigui e indicacionnan manera tur preso den Guarda Nos Costa mester haci. Esaki ta implica cu e muchanan a keda cera den cel cu nan mama for di 6:00pm te cu 8:00am; entre 8:00am pa 10:00am nan por a sali un rato y despues nan ta bay cera back.

E muchanan aki a drumi riba vloer y a keda cera dos dia ilegalmente sin ningun orden di detencion ni un base legal huridico, algo cu ta contra tur derechonan fundamental, tratadonan internacional y hasta e mesun Constitucion di Aruba.

Mama di e muchanan

Pa loke ta trata e detencion di e mama, e sentencia ta señala cu tabata existi un solucion menos pisa cu su detencion, pa motibo cu el a presenta un solicitud di asilo cu e tempo ey tabata den proceso. Por lo tanto, ex-minister di Husticia por a haci uso di su poder den virtud di usa articulo 19d y 19f di Decreto di Admision pa obliga e persona aki permanece den un luga destina pa e minister, den cual por tabata protegi contra salidanan no autorisa.

Ex-minister Bikker no a fundamenta suficientemente pakico den conformidad cu e articulo ey no a implementa un medida menos pisa y drastico cu e detencion di e mama, mirando cu e tabata den un proceso di asilo.

Dia 3 di september 2020 hues a declara cu e detencion di e mama tabata ilegal y a duna orden di libertad inmediato.