‘E Revolucion di e Pan Bati’

Pop-up Cafe, un iniciativa conhunto di Aruba Coffee Roasting Company y Itza Pizza, mas o menos un luna pasa a habri nan porta na fin di caya grandi. E dos producto local ta situa na caya grandi pa asina ‘haya sa kico ta e situacion na caya grandi ta’.

Kico ‘e revolucion di pan bati’ ta encera Germille Geerman di Itza Pizza ta splica Bon Dia mas den detaye.

Sr. Geerman pa algun tempo ta trahando pizza den su manera pa algun tempo caba, enfocando riba catering pa evento priva. Sinembargo pa sr. Geerman pa pasa na un escala mas grandi semper tabata e idea, pero e mester a pasa di un manera ‘natural’. “Mi conoce e economia di Aruba, un business ta bon ta ora e por financia su mes. Tin hopi compania cu mi ta mira ta ta fia placa y ta cera bek no mucho largo despues.” Aruba no tin hopi startup nan na e punto aki, segun sr. Geerman. Pues aunke e plan semper tabata pa habri un restaurant, e mester bay riba su ‘mesun pace’.

Pa e trahado di pizza e calidad di e cuminda semper tabata prome. Despues di a haya un formula interesante den e pizza vegano, tempo a bin di establece na un lugar cu lo por fungi como un ‘home base’. Pues ki nan sr. Geerman ta gradici Aruba Roasting Company cu ta colabora cu Itza Pizza pa asina por brinda un experiencia di producto autentico Caribense, cual segun e, companianan grandi no ta ofrece mucho den e aspecto ey.

‘No ta bende pizza si no nostalgia’
Pa sr. Geerman, e concepto tras di Itza Pizza y su pizza vegano no tabata trata specificamente di traha pizza. E no kier a pretende di competi cu companianan grandi cu ya caba ta ofrece pizza. Pero sr. Geerman a haya interesante con hende cu alergia na sea keshi, of masa pa añanan tabata cont’e cu nan no por come pizza. Asina sr. Geerman, kende anteriormente tabata traha como videografo, pero cu un background den cushina, a cuminsa elabora e masa pa e pizza traha di maishi rabo. E mansa sr. Geerman a elabora pasobra su yiu ta sufri di deficiencia di hero. Y maishi rabo ta yena cu hero.

Ora cu sr. Geerman a inventa e mansa aki, tur cos a fit mane puzzel na otro “Mi ta haya cu nos a perde contacto cu nos cushina tradicional, e gusto di hende awendia ta mas pa cosnan cu companianan grandi ta traha. Yambo por ehempel hopi hende cu mi conoce no tin smaak mas p’e pasobra nan ta pensa esaki ta bin den forma di sopi so. Pero bo por ta mas creativo den cushina.”

T’asina cu e sintesis entre pizza saludabel, di calidad halto y cu un identidad Caribense di sr. Geerman a nace. Riba medionan social Itza Pizza a publica con hopi hende ta haya nan keshi vegano dushi, algo cu a tard’e basta tempo pa elabora maske ‘mi tabatin experiencia trahando keshi den pasado caba’. “Cuminda ta cultura pa mi, mi ta hay’e importante pa hende uni bek y corda un tiki kico nan identidad cultural ta.” Pues esaki ta kico sr. Geerman kiermen cu ‘e revolucion di e pan bati’, trece cosnan di nos pasado bek di un manera innovativo.

Cuminda saludabel
E consenshi di hende rond mundo pa come saludabel ta algo cu sr. Geerman ta balora. “Pero masha tiki hende ta come crioyo ainda.” Un anecdota interesante por ta por ehempel con pa e generacion di hoben studiando na Hulanda, ora un Taco Bell a habri na Eindhoven ‘tur hende a bira loco y bay para den rij’. E ora ey e pregunta cu ta keda segun sr. Geerman, ta dicon hende no ta straña cuminda crioyo.

Combinando e aspecto vegano cu crioyo, sr. Geerman a haya sa cu aunke hopi hende ta bira vegano pa escogencianan den nan estilo di bida, tin persona cu no tin un escogencia mes pa via di alergia.

Un aspecto cu sr. Geerman ta gradici pe ta cu recien famia Kelkboom a cater hunto cu Itza Pizza na Carubbian. Ora a topa na Carubian, e dos producto local a scoge pa cross promote otro mirando cu ambos ta enfoca riba cuminda saludabel y vegano traha localmente. Asina e famia a colabora cu sr. Geerman y awo Itza Pizza ta ofrece nan pizza dàbarú, cu pidanan di veggie burger di e famia su catering riba dje. “Esaki ta un partnership clave, pasobra como productornan local bo no tin nodi competi cu otro si boso tin e mesun balornan na pecho. No tin cu traha hunto pa promove cuminda Caribense.”

E Pop-up Cafe a tene su ultimo ‘Vegan Night’ ayera anochi cu un acogida sorprendente na fin di caya parti anochi. E Artista Aymar a deleita publico cu musica den estilo Bossa Nova y Boleros. Cu esaki sr. Geerman lo kier argumenta cu caya grandi tin mas potencial di loke ta wordo haci awo. Particularmente e ta haya cu por ofrece mas persona creativo incentiva pa por traha riba conceptonan pa trece bida bek na caya grandi. Particularmente e ta haya cu mester ta mas creativo, tumando en cuenta e fenomeno di e-commerce cu hopi hende ta wordo atrai na dje pa via di prijsnan mas barata. Den un proximo edicion nos lo elabora mas riba e punto di bista di Itza Pizza como un negoshi nobo den caya grandi.