Educacion na tur nivel ta un di e markers nan mas importante pa un sociedad en general. Tantisimo rapportnan di por ehempel Nacionnan Uni, Banco Mundial, Organisacion Mundial di Salud (WHO) y Fondo Monetario Internacional (IMF) ta indica cu educacion nacional riba nivel adecua ta hisa crecemento economico, pero tambe ta hopi positivo pa otro indicadornan manera salubridad, criminalidad y e funcionamento politico di un pais. Dus un bon sistema di educacion ta brinda bentaha profundo.

Na e momento aki un meneer/juffrouw di scol ta maneha entre 20 pa 30 mucha den un klas na basisschool y esaki tambe ta ongeveer mesun cantidad na bovenbouw. Un meneer/juffrouw lo kier brinda tur studiante e miho servicio di enseñansa posibel, pero e ta simplemente imposibel pa un leerkracht duna cada mucha e atencion personalisa.

Den e contexto aki Inteligencia Artificial por brinda posibilidadnan enorme, den forma di “Personal AI Assistent”, manera Microsoft “Co-Pilot” y “TeachMate AI”.

Kico Inteligencia Artificial por Nifica pa educacion?

Un rapport hopi extensivo di Estados Unidos di Merca su departamento di educacion ta bay den detaye over e topico aki. Pero den general Inteligencia Artificial ta brinda ambos e studiante y e educador bentahanan profundo.

Na prome lugar AI, por brinda cada studiante un nivel di educacion ultra-personalisa, pa cua vak cu ta. Imagina tin un studiante cu ta hopi bon den rekenen pero menos bon den Nederlands. Wel un AI-assistent lo den e caso aki duna e studiante obhetivonan di rekenen mas dificil pa tene e studiante motiva y pa desaroya su habilidadnan den rekenen riba e nivel cu ta posibel, den caso di idioma e AI-assistent lo duna e studiante extra tarea y cuanto bijles y sosten necesario, na e nivel y speed cu e studiante lo desea.

Pa e educador, un AI assistent por automatisa partinan grandi di kijk na proefwerken, e lo por yuda e educador traha proefwerken y oefeningen cu un toke ultra precies, haciendo uso di analitica avansa pa wak e desaroyo di full e klas y cada studiante individual. Cu esaki lo spaar hopi manuren cu educadornan lo por usa pa brinda mas ayudo personalisa ainda.

Con Gobierno por Yuda na Aruba?

Un gobierno tambe por asisti dor di brinda programanan y subsidionan pa studiantenan menos afortuna. No tur hende por afford un laptop, tablet cu WIFI na cas. Pa cu esaki nos por tuma inspiracion di programa masivo na India, unda a literalmente parti tablet gratis pa tur hende cu tin mester di esaki y cu su conexion di internet. Tambe mester bin programanan di asistencia pa studiantenan cu tin dificultad pa usa herment asina manera AI of computer/tablet en general.

En fin, e posibilidadnan cu Inteligencia Artificial ta brinda educacion ta enorme. E ta mi speransa cu Aruba por ta parti di esaki.