Pa habitante di Savaneta Lilly Peterson, e splicacion y interpretacion di DIP riba e ROPV 2019, esta e Plan di Ordenanza Teritorial cu regulacion, pa pone un chickenfarm den un area ‘rural’ y cerca di viviendanan ta asombrante.

“Den edicion di Bon Dia Aruba di 12 di Juni, DIP ta bisa cu den ROPV cu Savaneta ta destina pa landbouw. Tambe ta bisa den e edicion, cu pluimvee (cu ta inclui galiña) no ta riba lista den cuadro di hinderwetvergunning.”

Pero, segun Peterson, articulo 3.5.9 Bestemming Landelijk gebied na pagina 31 di ROPV 2019 ta bisa claramente cu den e destinacion di area rural, e enfasis ta riba vivienda y un funcion agrario y pa preserva e balornan presente. Como tal, e area rural ta fungi como un buffer of zona di transicion entre areanan residencial y areanan natural y naturalesa y rural.

E destinacion ta brinda espacio pa sector agrario, cu ta cuadra cu maneho di ROP 2019. Ta permiti tur caminda den e area, actividadnan agrario y di horticultura como actividad empresarial, pues sea ta planta riba e tereno mes of den asina yama ‘greenhouses.’

“Locual no ta permiti tur caminda ta cria di bestia, incluso galiña tur caminda den area rural, segun e propio ROPV,” Lilly Peterson a bisa.

ROPv 3.5.9

E propio ROPv riba pagina 31, capitulo 3.5.9 ta bisa cu cria comercial di bestia, incluso galiña pues por crea molester grandi pa esnan cu ta biba cerca. Aki ta papia di molester di holo, zonido y stof. Mas ainda, mucho criadero banda di otro ta conduci na risiconan pa salu, por ehempel door cu e animalnan riba otro por contagia otro. Como tal, e ta importante pa den caso di cria comercial (di galiña) cu ta aplica zonificacion (nota: ‘Daarom zijn al deze activiteiten alleen toegestaan na wijziging van dit ROPv’). Y p’esey tur e actividad aki ta permiti solamente despues di cambio de ROPV.

E ROPv 2019 a identifica Savaneta y Butucu, cu ta brinda suficiente espacio leu di e casnan. Santa Rosa tambe mester duna su conseho riba establecimento di un negoshi di cria.

“E propio ROPv ta papia cu cria di bestia comercial, incluso un chickenfarm por crea molester. Direccion Legislativo y Asuntonan Huridico, y ta bon pa DWJZ como tal mester adapta su lista,” Peterson comenta propone . “Un chickenfarm cu ta keda mas halto cu e casnan y ta den direccion di biento, ta capta esaki y trece zonido y holo desagradabel pa e bario. Con ta para cu nos hendenan cu tin problema cu nan rosea manera asma?” Ademas, Lilly Peterson ta interesa pa haya sa kier sa kico ta e conseho di Direccion Agricultura, Cria y Pesca, DLVV cu tambe ta un rekisito pa permiti un actividad agrario.

Bon Dia Aruba a tuma contacto cu Direccion di Agricultura, Cria y Pesca cu a bisa di no a haya peticion pa duna conseho riba e proyecto.

ROPv ta un concepto

“Pero pa mi, locual ta importante ta cu e ROPv 2019 ainda ta un concepto. Kiermen ainda tin posibilidad pa haci cambio. E propio concepto ta bisa cu cria di galiña entre otro (pluimvee) ta crea molester y tur e actividadnan aki ta unicamente permiti si cambia e ROPv.”

Locual Peterson ta haya yamativo ta cu Director di DIP a bisa cu ta permiti unicamente dos actividad comercial di cria na Sero Alejandro, y ta puntra si esaki ta formalmente describi. Realidad ta cu e proceso aki no ta formalmente describi ningun caminda. “Hopi biaha ta bisa algo, y despues e decision ta cambia. Mester tin un decision fiho riba papel cu no ta bin mas (di e tipo di proyecto aki) na Sero Alejandro. Nos tin partinan na Savaneta cu ta rondona cu sero cu tin actividad agrario cu ta tumando luga. Esaki ta patras di e tanki di awa di WEB. Dicon nan no ta pone e chickenfarm ey nan? Tin agricultura caba na Savaneta. Por restructura esaki na lugar di busca pa kita tur e berde na Sero Alejandro y crea un mal bista den e seronan di Savaneta cu di leu hende por wak,” Lilly Peterson a sigui comenta.

“Tambe tin plan pa verkavel Ser’i Juwana den pidanan chikito pa planta, segun Mario Maduro di DIP a informa mi. Ami, mescos cu World Bank Group ta boga pa hende planta den nan cura di cas. E mihor tereno pa agricultura ta den cura di cas. Mi a haya un organisacion pa cuminsa duna les di plantacion den cura di cas.”

Riba e punto cu segun e ROPv 2019 un actividad comercial mester cumpli cu construccion cu ta cuadra cu e area rural, Peterson ta sinti cu en absoluto a tene cuenta cu e aspecto aki. “A rosa e tereno cu tabatin palo di y mata so, y e unico construccion tabata di e fauna cu tabata biba den e area. Ora di usa palabranan mester pone splicacion acerca, pasobra e ta keda habri pa interpretacion di cada persona,” Peterson a ilustra. “Y unabes cu construi algo riba e tereno, automaticamente por considera cu un otro actividad di construccion ta cuadra den e paisahe.”

(Articulo ta continua riba pagina 4.)