Den e dianan aki presupuesto 2019 ta loke mester ta captando nos atencion. Loke si ta logra ta e afamado debate – inutil y excesivo – tocante cannabis. Gustosamente nos lo laga e discusion aki pa loke e ta, sin embrago, si e ta duna señal di cierto malestar entre e partnernan den coalicion, anto nos lo mester tira un bista riba esaki. Realmente, nos no por comprende con dos parlamentario cu ta sostene e gobierno aki ta clash cu otro tocante e punto di cannabis. Djis lesa loke nan propio acuerdo di gobernacion ta bisa: “Medicina alternativo: Lo implementa e proceso pa legalisacion di cannabis medicinal. Mester tin e oportunidad cu e pashent por scoge pa medicina alternativo, entre otro cannabis medicinal, cu a mustra avancenan grandi den area di epilepsia, anorexia, glaucoma y maneho di dolor cronico.”
Niun hende a obliga nan di bay di acuerdo pa goberna a base di esaki. Realmente e texto aki ta duna di comprende cu no falta ningun claridad den e asunto aki. Naturalmente cu cada ken ta keda cu nan propio pensamento. Esun cu ta desea di legalisa marihuana pa uso recreativo lo sigui boga pa esey, aunke no tin base actualmente pa apoya esaki, y lo bay dura hopi, if ever, pa yega na e punto ey. Esun cu ta di opinion cu no mester legalisa nada mes, tambe ta keda cu su opinion, pero ta mara tambe na e acuerdo aki, cu ta papia pa su mes.
Ademas, ta bira tempo pa nos cuminsa separa opinion di hecho, tambe e parlamentarionan cu eventualmente no ta comprende. Esey ta cu basicamente droga y medicina hopi biaha conoce un linea fini di separacion. Den un pasado remoto, e promenan cu tabata droga riba productonan di opium tabata esnan cu tabatin acceso na e remedinan cu tabata contene substancia deriva di opium. Y ken eseynan tabata? Medico y boticario, cu tabatin acceso, bon o menos bon controla, na e substancianan aki. Di e manera aki tambe tin mas remedi cu por pensa cu nan ta di origen ‘sospechoso’, si nos no sa miho. Ki pensa di un simpel remedi manera codeina, cu ta deriva di opium, cu ta usa pa siglos caba den remedi pa tos o pa trata diarea. Nos ta cla pa yama esaki droga? Asina ta e caso di mas substancia, y e caso di cannabis no ta diferente. Y mientras na Aruba nan ta bisa cu ‘nos mester haci research ainda’ nos ta puntra nos mes ta ki research nan a haci na nos hermana isla Curaçao, unda azeta CBD , mescos cu na Hulanda, ta algo cu bo ta cumpra ‘over the counter’. Na Aruba, al contrario, un ciudadano inocente, o talvez un poco naief, a hay’e ta paga 750 florin di boet pasobra el a bin Aruba cu un par di boter chikito di azeta CBD.
Desde ki tempo nos como teritorio chikito mester bay haci cantidad di research cu rond mundo nan a mir’e di tur banda caba. Ta ki problema tin pa simplemente tuma e normanan Hulandes y di Curaçao, impone nan aki tambe y ‘get it over with’. De paso e coalicion ta cumpli cu loke ta para den nan propio acuerdo, y nan por pone un punto tras di e asunto aki. Mision cumplida… Pero no, mester busca pleito, y mester tene conferencia caro, pa un suma iresponsable, y cu no tin nada di haci cu trabao di e ministerio cu a organisa. Die manera aki ta e coalicion mes ta haci su mes vulnerable pa atake y critica di oposicion, cu t’ey pa haci net esey: probecha di e debilidadnan di e coalicion; bo no por tuma nan na malo cu ta esey nan ta haci. Sin embargo, ta recomendable pa e miembronan di e coalicion busca e eror cerca nan mes. Y tin un motibo valido pa haci esey: tin cos mas importante pa papia y trata, como gobierno, cu un discusion inutil y innecesario tocante un punto cu facilmente nan por cumpli cu loke a acorda.
Por ehemplo e necesidad di caba di trata presupuesto na tempo pa por sigui atende e cosnan cu realmente ta preocupa nos. Manera e situacion social cu ta sclama pa accion. E placa t’ey y nos no mester tende excusa mas. Tambe e situacion financiero cu no ta mehora ‘por arte de magia’. Nos por tuma nota cu gobierno tin pensa di pone e servicio di kadaster for di e ambiente gubernamental, creando un servicio priva riba e tereno aki. Esy tin su pro y su contra, cu ta dificil pa huzga si nos no ta dispone di e modelo y business plan di e entidad. Despues di e debaclenan den e asunto di parkeo den Playa lo ta recomendable pa analisa e asunto aki bon.
Y, tin algo mas. E forma di baha payroll aki, a traves di saca cierto servico for di gobernacion, ta camufla cu nada ta sucediendo pa resolve e problema di exceso di personal unda e exceso di personal ey ta. Generalmente no tanto den un servicio di kadaster. Nos no a tende nada ainda cu ta mustra riba restructuracion unda realmente ta necesario.
