Esnan cu ta cana liber ainda tin mesun mentalidad
Campaña ta un cos, pero haci nos tur ridiculo te na Hulanda, esey ta un berguensa. E video cu nos prome ministro y ministro encarga cu infrastructura y integracion, unda cu grito nan ta purba convence un grupo di inmigrante Latino, cu nan tin e formula magico pa resolve tur e inkietudnan di e grupo aki, a bira viral y a yega Hulanda tambe. Parlamentario Bosman, bon conoci pa su critica constante y skerpi riba manera di opera di gobierno di Aruba, a sali dilanti cu preguntanan fuerte na e ministro encarga cu asunto interior y relacion den Reino tocante e promesanan idiota di e prome ministro di Aruba, cu e lo bay percura pa nan haya paspoort Hulandes den tres aña. Ministro Plasterk a cumpli cu e deseo di contesta pronto y a desmenti cu por tin cambio den e condicionnan pa haya paspoort, y di ningun manera a apoya e prome ministro Arubano den su ponencianan completamente for di sla.
Su colega di infrastructura a bay mas leu ainda y a anuncia cu e lo percura pa un sistema digital nobo pa Dimas, pa por procesa e peticionnan pa permiso den tres dia… Esey ta straño, pasobra den tur e añanan cu e tabata maneha stranheria, tabata dificil pa procesa un peticion dentro di e periodo di seis siman, stipula pa ley, y tabata haci hopi uzo di e extra seis siman cu ley ta permiti pa keda cla cu un decision riba un peticion. E triki di semper tabata pa pone hende bao presion, alargando e proceso innecesariamente, pa haci nan mas accesibel pa subi e caminda di soborno. Anto awor nan ta bay haya tur cos den tempo record, anto por nada? Bueno, honestamente dicho, esey e no a bisa cu tanto palabra, cu ta sin pago… Loke e no a clarifica tampoco ta si pa e fabor di tres dia bo por acudi na Dimas mes, of bo mester bay na un cierto vivienda den Playa Pabao, unda henter e bario tin klinker, masha bunita. Lastima cu no ta tur hende por muda pa e bario ey… En todo caso ey bo mester ta, o mester tabata, te algun tempo pasa, pa bo por regla asunto bon regla. Si tur e ministronan sigui e ehemplo, anto nos no mester di Bestuurskantoor mas tampoco. Pero bueno, nos a custumbra caba cu e gabinete aki no ta pensa den spaar placa, esey no ta nan cos. No ta nos prome ministro a declara cu e ta orguyoso di a haci tanto debe? Anto si e bolbe como ministro presidente, esunnan cu no kier sigui paga lo mester emigra?
E ministro encarga cu infrastructura tampoco a duna un splicacion pakico e ta desea di traha un database nobo pa Dimas. Esey ta pasobra e Hulandesnan cu mester haci nan investigacion riba e 2300 ontheffing di Paul Croes, pa determina si nan a haya un permiso di estadia tambe, y si tabatin pago envolvi, a interveni den e servicio. Nan a bay asina leu tambe di saca e sistema digital di Dimas for di e plataforma di DIA, cu ta e departamento di gobierno pa servicio di IT, y a pone traha isola. Esaki sigur pa nan por traha trankil riba e parti aki di e caso hudicial IBIS, pero por ta tambe cu nan no tin tanto confiansa den e director di DIA, cu al fin al cabo ta riba lista electoral di e partido den gobierno. Nos no ta kita nan rason pa haci esaki, pasobra ta dificil pa nan, y nos tambe, kere cu Paul Croes tabata cobra miyones na su banda, y na banda di e permiso di estadia tabata haci tur cos gratis, puramente pa amor di prohimo.
Ora nos contempla tur e maniobranan aki, sin escrupulo, di e personanan cu mester duna ehemplo den e comunidad aki, nos ta yega na e conclusion cu no ta suficiente pa e ministro sin cartera haya su dia den corte. E problema mayor ta e mentalidad enfermizo cu a penetra den henter e aparato, cu tin añanan custumbra caba cu loke nos ta yama e impunidad di e ministronan. Como funcionario publico bo no ta bay busca problema cu nan, pasobra nan poder tabata sin limite, unda un ministerio publico tampoco tabata dispuesto pa actua den caso di corupcion y abuso di poder, pero tabata mustra constantemente den direccion di parlamento cu segun nan mester a actua. Tabata parce cu nan tabata e uniconan na Aruba cu no tabata sa cu den parlamento cada gobierno tin su mayoria, cu ta tapa tur cos malo cu un gobierno por haci.
Aunke nos ta keda sigui e maniobranan di e partido aki den e ultimo dianan aki, no cu asombro, pasobra nada di nan ta sorprende nos mas, pero si cu berguensa pasobra na final di dia, esaki ta nos pais, di cual nos kier sinti nos mes orguyoso. Esey ta algo dificil pa logra ora ta parce cu ta crimen organisa mes ta na mando. Nos speransa ta cu mayoria di pueblo tambe comprende esey.
