Februari ta conoci como e luna di amor. Dia di San Valentin (Valentine’s Day), aunke no un dia di fiesta oficial ta wordo celebra mundialmente ariba gran escala. For di inicio di februari hopi hende ta cuminsa planea y prepara pa e dia special aki. Pero manera den hopi ocacion, un banda cla tin su banda scur tambe.
Aplicacionnan di cita manera Tinder, Bumble, OkCupid entre otro tabata popular caba prome cu e pandemia a cuminsa, pero pandemia a haci cu esakinan a explota den popularidad. Tinder, e aplicacion mas descarga di citanan online a yega tres miyon di “swipes” den un solo dia na maart di 2020 y el a kibra e record ey mas cu 100 biaha desde e fecha ey.
Aunke e aplicacionnan aki a yuda hopi persona conecta cu otro persona soltero pa hopi aña, algun persona a yega di bati alarma ariba e aplicacionnan aki y personanan cu ta haci uso di dje.
Esaki ta e caso specialmente pa hende muhe cu ta experimenta un cantidad excesivo di intimidacion y abuso ariba e plataformanan, mayoría di biaha esakinan ta bin di parti di hombernan heterosexual.
Un di e preocupacionnan mas grandi di e usuarionan ta e violencia sexual cu por pasa na momento cu e usuarionan encontra cu otro den persona. Aunque tin un aumento di usuarionan femenino di e aplicacionnan aki cu ta tuma precaucionnan, manera informa familiar- of amistadnan di nan plannan, e personanan aki sigui ta vulnerabel pa violencia sexual.
Algun usuari tambe ta reporta stress psicologico, incluso experiencianan mas extremo. Un estudio di 2017 di Pew Research Center a indica cu 36% di e personanan cu ta busca cita online a haya nan experiencianan extremadamente of hopi malo. E muhenan cu ta busca cita entre 18 y 35 aña den e estudio di Pew di 2020 a informa tambe un aumento di menasanan di di dano fisico. (19% compara cu e 9% di hombernan).
En general un estudio a mustra cu hombernan hetersexual of bisexual casi nunca tabata expresa nan preocupacionnan ariba nan seguridad personal mientras nan ta usa e aplicacionnan aki, mientras cu e hende muhe tibetan un preocupacion hopi mas grandi,
E escritora di cultura hubenil Nancy Jo Sales a keda asina impresiona pa su experiencia ariba e plataformanan aki cu el a skirbi un buki tocante esey: “Nothing Personal, my secret life in the dating app inferno”.
E cosnan aki a wordo normalisa asina lihe, cosnan cuno ta normal y cu nunca mester ta normal, manera e cantidad di abuso cu ta pasa, y e riesgo y peliger di dje, no solamente fisico si no emocional”, el a bisa tocante su experiencianan. E ta adverti cu no tur hende cu ta usa e aplicacionnan aki tin experiencianan negativo, pero tin suficiente cu mester papia ariba e daño cu e hendenan ta sufri.
Tinder por ehempel a introduci un sistema automatico pa detecta mensahenan y lenguahe abusivo, despues e ta pidi e escritor pa reconsidera e mensahe prome cu mande. Algun plataforma a introduci tambe verificacion di usaurio, den cual e plataforma ta compara potretnan cu ta wordo subi den un profile cu un selfie di e usuario. E medida aki ta destina pa yuda preveni e “catfishing” y abuso, ya cu e usuarionan no por sconde tras di identidadnan falso mas.
