Carnaval 63 a yega su fin. Manera custumber e tabata colorido y yen di ambiente. Pero banda di esaki tambe tabatin e banda menos bunita. E aña aki polis a detene casi dobel di e cantidad di hende: 41 persona compara cu 25 na 2016.
E detencionnan aki a cay durante e ultimo parada na Playa. Mayoria a keda cera pa motibo di bringamento y buracheria. Tabatin varios pelea riba e ruta di e parada grandi como tambe den e Last Lap. Na momento cu e Last Lap a yega Wilhelmina Park, polis mester intermedia pa un discusion entre un homber y 2 otro persona y a detene e hombernan, prome cu e situacion bay for di man. Aki un agente policial a cay abou, debi na e rapidez cu a purba actua ora cu tabata purba boei e hombernan (riba potret).
Banda di e caso aki, polis a haci detencion den cercania di Plaza Betico, Rotonde Las Americas, pabou di Talk of the Town, banda di Parlamento y na Royal Plaza. E cantidad di detencion na parada di San Nicolas si tabata menos: 8 compara cu e 23 di aña pasa.
