E organo legislativo di Aruba, Parlamento, ta sinti cu e capacidad di traha ley ta tuma mucho tempo y como tal ta urgi Gobierno pa bin cu un ‘gedoogbeleid’ esta un maneho di tolerancia pa permiti piscamento cu harpun. Parlamentarionan di partidonan di coalicion kier pa permiti piscamento cu harpun for di awe caba.

Esaki ta motibo tambe pakico a urgi Presidente di Parlamento pa yama un reunion publico mesora, despues cu a termina cu e reunion informativo unda Minister di Husticia Andin Bikker a presenta su pre-concepto di ley pa cambia articulo nuebe di e Ley di Proteccion di Naturalesa (natuurbeschermingsverordening). Ta e ley aki ta prohibi uzo di harpun y otro armanan pa uza bou awa.

Minister di Husticia Andin Bikker a presenta su pre-concepto di ley cual el a traha riba dje den algun dia, pasobra el a tuma nota cu Parlamento kier solucion. El a hinca un ley den otro pa reemplasa e articulo den e ley di proteccion di naturalesa, y a admiti cu e no a consulta cu ningun organo di conseho. E Minister a bisa cu e pre-concepto mas bien ta un base pa discusion y pa yega na un ley cu tur hende por carga, particularmente e piscadonan cu kier uza harpun cu ta haya e ley actual mucho rigido.

Su argumento pakico a uza e ley di naturalesa pa reglamenta uzo di harpun ta basa riba e ley na Saba unda ta permiti uzo di harpun. Y na Saba tin un di e poblacion di coral mas grandi na mundo, esta e Saba bank.

Bikker a bisa di a tuma nota di e conseho di emergencia di Departamento di Naturalesa y Medio Ambiente cu ta pidi pa regla e asunto via e ley di pesca. “ Segun mi ta Parlamento mester dicidi. Sea ta strawberry of vanilla, mester regl’e,” e Minister a bisa.

Cris Romero ta kere den gedoogbeleid

Su colega Cris Romero ta bisa cu ta for di 2018 ta tratando pa yega na un areglo y hasta a pidi conseho na Departamento Huridico pero te ainda esey no a bin. Y si kier bay cambia e ley di naturalesa, lo por haya problema cu Tratadonan. Hasta si regla esaki den e ley di pesca sinembargo, e prohibicion ta den e ley di naturalesa. P’esey e Minister ta kere cu mester sigui deseo di Parlamento pa bin cu un maneho di tolerancia, pasobra cualkier ley pa regla e asunto lo tuma su tempo. “Mirando cu Parlamento ta desea un gedoogbeleid pa e por sosode de inmediato, ta na su luga pa e organo pidi Gobierno pa personanan por cuminza tira pisca lo mas lihe posibel, na un forma responsabel, cumpliendo cu tur rekisito.” Segun Romero, Direccion di Agricultura, Cria y Pesca a defini e rekisitonan.

Free for all

Minister encarga cu e ley di naturalesa, Marisol Lopez Tromp tambe ta kere cu mester pura pa regla e peticion di e piscadonan cu harpun. Pero e no ta kere den un maneho di tolerancia, ni un ley traha pura pasobra consecuencianan lo ta pio. Un ley mal traha sin tur su consehonan lo no keda acepta pa Raad van Advies. Ademas e no ta de acuerdo cu e ley propone pa Minsiter Bikker, ya cu no ta specifica e grupo di piscado, sino mas bien, e ley di Bikker lo permiti tur ciudadano di Aruba e posibilidad pa pisca cu harpun. “Segun mi nos kier yuda un grupo specifico di piscado,” e Minister a puntra, agregando cu nan tambe lo ta miho sirbi si no tin un ‘free for all.’

Como tal e tabata kier mas tempo pa haya conseho y adapta e concepto, sin mester perde mucho tempo, ya cu tin consehonan caba con por permiti un grupo specifico uza harpun. Mas ainda, e como Minister di Medio Ambiente y encarga cu e ley di naturalesa ta responsabel pa un maneho legal. “E meta ta pa e ley ta exitoso,” Lopez Tromp a bisa. El a uza e ehempel di Ley di Cacho cu a pasa Parlamento pero door cu no a tene cuenta cu diferente aspecto, “practicamente e ley no ta funciona y tin mas cacho riba caya cu nunca.” E Minister ta kere cu ta importante pa tene cuenta cu consehonan pa e ley bin na forma duradero y responsabel.

Debate y reunion publico

Pa fraccion di AVP e ta cla cu e hecho cu a bin den Parlamento pa un cambio di ley cu no ta rekeri decision di e organo, ta mustra cu no tin acuerdo entre e tres Ministernan.

Ricardo Croes ta sinti cu e Minister di Teritorio, Infrastructura y Medio Ambiente ta mas preocupa cu naturalesa cu interes di piscadonan. “Mi ta sinti cu e Minister ta defende su cartera, pero mi no a sinti e comprension pa e situacion di hamber y e gritonan.” Croes ta apoya e pre-concepto di ley di Bikker. Pero Croes a bisa Minister Lopez Tromp cu e mester corda cu Parlamento por tuma medida contra Ministernan cu no ta cumpli cu homogenidad den Gabinete. E ponencia aki a lanta un reaccion di Marisol Lopez Tromp kende a mustra sr. Croes cu na final, si algo no bay bon, e como Minister ta carga responsabilidad.

Edgard Vrolijk tabata e prome cu a pidi Presidente di Parlamento pa yama un reunion publico mesora pa instrui Gobierno pa bin cu un gedoogbeleid pa piscamento cu harpun, pendiente un ley. Su proposicion a keda sosteni pa su coleganan di fraccion y tambe di coalicion.

Alan Howell y Dellanire Maduro di POR tabata contento cu e ley presenta pa Minister Andin Bikker.

E dos miembronan di fraccion di AVP, Arthur Dowers y Robert Candelaria tabatin pregunta si tabata necesidad pa a envolvi Parlamento den un decision cu ta netamente di Gobierno y ta sinti cu ta den conseho di Minister mester yega na un areglo. Marlon Sneek a adverti “mester tene cuidou cu sopi pura ta sali salo.”

Proregulacion pa grupo specifico

E Minister cu tin tur bista riba dje, Lopez Tromp, a bisa cu e ta pro regulacion pa un grupo cu mester. “Pero no mester cab’e den un dia of den un siman si a warda 12 aña. Nos kier regl’e pa esnan cu ta biba di dje. Pero e mester ta algo cu tur tres Minister por regula bon. E no por manca e ley di naturalesa cu ami mester proteha, y tur e especienan. E ta importante pa regula e piscamento di harpun no solamente basa riba consehonan pero tambe basa riba e cantidad di hende cu ta depende di e tipo di pesca aki pa nan pan, ken nan ta y diferente otro punto. No mester inventa e wiel di nobo, tin diferente conseho caba.” E ley di proteccion di naturalesa ta pa proteha biodiversidad natural. E piscamento di harpun ta di un interes economico y e ferviente deseo di un grupo di piscado cu tambe ta interes importante. P’esey mes a pidi pa trece e cambionan den e ley di pesca. E areglo mester cuadra cu e responsabilidad di cada tres Minister y ta cumpli cu tratadonan. Tin forma pa regula excepcion pa un grupo, e Minister a sigui bisa, teniendo cuenta cu proteccion di especienan. E ley proponi pa Minister Bikker ta hopi general y mas bien ta permiti tur ciudadano aplica pa permiso pa un harpun y esey no ta locual Parlamento a pidi, esta pa yuda un grupo specifico di piscado.

Gedoogbeleid

Minister Marisol Lopez Tromp a bisa cu e ley presenta pa Bikker ta mucho amplio. Pasobra e ley ta mucho general, y mester enfoca riba e grupo di meta. E ta enfatisa cu e areglo aki mester keda bou e Ley di Pesca, pasobra e ley di naturalesa ta pa proteha flora y fauna. E mes no ta sostene un maneho di tolerancia, pasobra ta bou un sistema asina aki ta haya hopi problema. El a topa hopi problema den su departamentonan netamente pasobra a hiba manehonan di tolerancia. Lopez Tromp ta adverti cu unabes habri e porta pa maneho di tolerancia, mas lo bin. Y esey lo nifica cu Parlamento mes lo no tin mas control.

Como tal e ta enfatisa cu e proceso mester cana su proyecto legal, pa crea claridad y cu por ehecuta e ley debidamente y na forma duradero.