Patch mas chikito rond di nan wowo. Cabes mas rondo. Tin algo hopi diferente tocante un grupo di bayena asesino cual cientificonan ta referi como ‘Tipo D’. Lo mester realisa test di DNA pa resolve e misterio oceanico aki.
Un ekipo di expertonan di bayena a bay sur di Chile januari ultimo, pa investiga e bayenanan elusivo aki. Nan a uza un dardo pa colecta muestranan di cuero pa test genetico. Previamente, e unico documentacion di Tipo D tabata den storianan y relatonan di un evento na 1955 di bayena trapa na costa, y potretnan di turista.
E muestranan di cuero lo pasa den analisis di DNA pa determina si e bestianan Tipo D ta un especie distinto na e orcanan normal.
“Nos ta hopi emociona pa e analisis genetico”, segun investigado di NOAA Fisheries, Bob Pitman. “Bayenanan Tipo D lo por ta e animal mas grandi sin descripcion ainda den e planeta, y un indicacion cla di con tiki nos sa tocante bida den nos ocean.”
E orcanan Tipo D inusual a wordo mira rond Antartica, pero ta parce di permanece fuera di e awanan mas friu. Pittman y su compañeronan a describi e animalnan pa prome biaha den un publicacion na 2010, sugeriendo nan wordo yama ‘bayena asesino sub- Atlantico’.
E team cu a bay Chile a logra capta video di e creaturanan aki, tanto for di riba awa como for di bou awa. E investigadonan lo por haya resultadonan di e test di DNA den e proximo lunanan, finalmente briyando un luz riba un enigma marino cu a permanece pa mas di 60 aña.
