Como pais nos ta en berdad enfrentando problemanan structural grandi, cual manera semper ningun politico kier discuti den manera publico con nan lo kier resolve esaki. A yega e punto cu nos no por hunga struisvogel politiek mas y simplemente haci cu e problemanan no ta existi. Pero na otro banda nos tin cu menciona cu tin oportunidadnan gigantesco tambe pa nos pais cual nos a skirbi detayadamente over den por ehempel medio Bon Dia Aruba pa mas cu 3 aña. E articulo aki ta bay ta un resumen breve over e oportunidadnan masivo cu por transforma nos isla den un manera profundamente positivo.

Energia:

Dor cu energia ta un costo inmenso directo y indirecto pa nos economia y pa tur habitante di nos pais, esaki lo ta un area cu mester di tension grandi. Si nos por na prome lugar baha prijs di coriente den manera fuerte, e lo traduci su mes den un manera hopi directo y grandi pa pueblo di Aruba.

Na prome lugar un gobierno nobo mester stimula:

  1. Haci tur cas na Aruba energiezuinig.
    Esaki lo por via verf dak blanco, isola e plafond, cumpra airco nobo, bentana cu coating special y te hasta verf cas cu coating special anti-infrarood. Hopi por wak e logica tras di e pensamentonan aki, pero lastimamente pa partinan grandi di nos pueblo esaki simplemente no ta un opcion financieramente.
  2. Den e segundo stap duna cada cas na Aruba su mesun sistema di 5 of te hasta 10Kwp di Solar panel. Ya caba usando e datonan di mas recien un instalacion di 10Kwp tin un rendemento di mas cu 38% pa aña. Un bez mas e problema ta mas den con nos por duna full pueblo e moda di instala panel solar.

Salubridad:

Haci un health scan gratis di full Aruba su pueblo adulto. Haci uso di e tecnicanan di “Predictive Analytics” pa midi e riesgo den ambos termino directo y den largo plazo di cada persona. Bin cu hermentnan digital di nivel halto cu Inteligencia Artificial cu por ehempel duna advies riba dieet, salubridad basico, y sport den manera full automatisa y gratis pa full pueblo.

Mientras tanto haci full e sistema di Salubridad na Aruba “Smart”, cu por ehempel:

  • Telefonista basa riba AI pa Eerste Hulp & Huisarts
  • Analytics y Dashboard pa cada verpleegkundige di Huisarts pa e por monitor live kico ta pasando cu pashent cu riesgo halto
  • Usa Inteligencia Artificial pa identifica cada pashent cu ta core riesgo pa situacionnan cu ta rekeri ayudo immediato.

Asina por brinda servicionan di Salubridad na e nivel di mas halto, cu gastonan hopi rasonabel. Tur esaki a keda presenta cu aporte di Leiden University su profesornan di mas halto na Ministerio di Salubridad Publico y AZV mas cu 7 aña pasa caba. Lastimamente na Aruba “gunfactor” ta dicidi cua proyecto ta bay dor y no bienestar di pueblo.

Transport Gratis Publico:

Transporte pa esnan di menos recurso ta un gasto inmenso y ya caba casi impagabel. Hunto cu autonan/busnan zuinig basa riba concepto electrico y cu Inteligencia Artificial por bin cu transporte gratis via e concepto “Social Electric Vehicle Robo Taxi” cual mi persona hunto cu ex-representante di KPMG a presenta na Ministerio di Economia y Ministerio di Transporte.

Fair Share & Entrada Universal pa Aruba:

Nos tin un sector hotelero cu tin ganashi inmenso y cual mayoria di e trahadornan ta gana minimuumloon. Terwijl cu cada trahador minimuumloon ta un deficit enorme pa nos sistemanan social di SVB y AZV. E siguiente gobierno MESTER kibra e tabu politico aki. Simplemente sector hotelero mester paga mas y contribui den manera “fair” na e sociedad unda e ta opera cual den nos caso ta Aruba. Ami ta un supporter di conceptonan manera entrada universal dor cu esakinan no ta discrimina den niun manera over por ehempel edad di pensioen of cierto rekisitonan. Ta propone manera na Alaska unda cada ciudadano ta haya un “Freedom Dividend” cada aña. Na aña 2023 esaki tawata $1.312,- US na Alaska. Dus Aruba lo por bin cu un concepto similar unda pueblo finalmente ta gosa den manera berdadero di nos turismo.

Caba cu Vriendjespolitiek

Un di e tareanan di mas grandi pa nos pais ta en berdad caba cu vriendjespolitiek y haya gobernantenan cu en berdad tin e bienestar di Aruba den bista. Siguramente e ministernan, y mi lo explicitamente menciona nan pa nomber:

  • Dangui Oduber
  • Geoffrey Wever
  • Glenbert Croes
  • Ursell Arendz

Ta funciona bou un politica di vriendjespolitiek intelectualmente. Solamente esnan cu ta cay na nan agrado ta wak nan ideanan progresa terwijl cu bienestar general di pueblo ta wordo poni un banda, simplemente paso of nan no ta gusta un persona of e idea no ta di balor directo politico.

Dia 6 di December mi ta spera cu finalmente e ideanan aki lo bin mas cerca di realidad.