Cuido apropia pa mascota ta e base di ta un doño responsabel. E ta importante ora cu bo adopta un mascota pa bo compronde cu e ta miembro cu lo agrega na bo famia cu lo depende di bo pa su bienestar y su salud.
Felizmente, e amor incondicional y felicidad cu e mascota ta trece na nos bida ta haci cu tur e responsabilidad cu ta bini cune ta bal la pena. Pa sigura nos mascota su salud y su felicidad, tin cierto necesidadnan cu tur doño di mascota responsabel mester provee.
Un mascota tin mester di cuminda saludabel
Di mesun manera cu hende, un mascota tin necesidadnan nutricional specifico. Cuminda di cacho ta diseña pa cumpli cu un cacho su necesidadnan nutricional, di mesun manera cu cuminda di pushi. Importante ta pa corda cu nan necesidadnan dietetico ta completamente diferente. Puppies ta rekeri un cuminda diferente na esun di cacho grandi. Ademas, cachonan cu tin cierto problema di salud por rekeri un dieta special.
Cuminda di ser humano usualmente no ta hopi bon pa cacho, pa motibo cu cosnan manera salo, garlic y siboyo hopi biaha ta malo pa nan salud of por ta hasta fatal.
Duna bo mascota acceso na awa limpi 24/7
Di mesun manera cu ser humano, un mascota tin mester di acceso na awa pa nan por sobrevivi. Semper provee awa limpi y fresco na tur bestia cu ta den bo cuido. Haci esaki accessible pa medio di pone esaki rond di nan cuminda, y yena esaki back por lo menos 2 biaha pa dia. Esaki lo mantene bo mascota fresco, hidrata y saludabel.
Si bo mascota ta biba den awa, manera pisca of turtuga, limpia su acuario por lo menos un biaha pa luna. Si bo no haci esaki, e por causa cu bo acuario lo hole malo, of bo mascota lo bira malo.
Cuido apropia ta inclui provee un shelter sigur y confortabel
Autonan, cachonan agresivo y predadornan ta un menasa pa pushi, cual ta e motibo dicon nan mester mantene nan mes paden pa nan mesun siguridad. Hopi pushi ta disfruta un cama of un espacio dentro di cual nan por separa y sinti nan mes sigur.
Si bo laga bo cacho sali for di bo cura of si e sali sin cu bo sa, sigura cu e tin un cadena cu informacion riba dje of cu e tin microchip, tambe sigura cu e microchip ta registra y bo informacion di contacto ta actualisa.
Un mascota mester bay baño regularmente
Varios tipo di mascota mester ricibi e oportunidad pa custuma cu e cas, pa asina evita e preocupacion cu accident lo pasa. Pushinan mester tin por lo menos un ‘litter box;.
Puppies generalmente mester bay baño cada un pa dos ora durante e dia. Un regla general ta cu un puppy por wanta su pishi of pupu pa e mesun cantidad di ora cu e edad cu e tin, mas un. Por ehempel, un puppy di 3 luna mester por bay baño cada 4 ora.
Sigura cu bo cacho semper tin un caminda limpi pa por bay baño y limpia su area regularmente.
Un mascota ta rekeri bishita na veterinario y habitonan saludabel
Pa sigura cu bo mascota ta saludabel, bo mester hiba nan un veterinario confia y local pa revisonan di salud por lo menos un biaha pa aña. Mantene bo mascota completamente vacuna. Limpiesa di su djente tambe ta hunga un rol importante den bo mascota su salud.
Semper corda cu bo mascota su felicidad, salud y bienestar ta lo mas importante. Aunke bo pushi of cacho no gusta, baña nan regularmente, pena nan cabey, corta nan huña y kita garapata. Tur esaki den combinacion cu otro ta sumamente necesario pa e bienestar di nos mascotanan tan stima.
