(AP) — Observadornan di structura gubernamental Britanico por ta den confusion den ultimo simannan mientras nan ta mira e pais pasa door di un sucesion di prome ministernan sin tene un eleccion. Mientras e Partido Labor den oposicion ta exigiendo un eleccion, e Conservadornan den gobierno ta pusha sigui pa scoge otro prome minister entre nan propio rangonan, cual nan tin derecho di haci pa motibo di e forma con e democracia Parlamentario na Reino Uni ta traha.
Pueblo Britanico nunca ta vota pa nan prome minister
Gran Bretaña ta dividi den 650 districto electoral, y hende ta marca e box di e representante cu nan kier pa bira nan miembro local den Parlamento, ‘MP’. Den mayoria di caso, esaki ta bay ta miembro di un di e partidonan politico mayor di e pais.
Similar na e sistema na Aruba, e partido cu gana mayoria di asiento por forma un gobierno, y e lider di e partido aki automaticamente ta bira prome minister. Mientras coalicionnan ta posible, e sistema di voto Britanico ta faborece e dos partido mas grandi y den mayoria di caso un solo partido ta tuma un mayoria absoluto di asiento, manera ta e caso pa e Conservadornan den e Parlamento actual.
Con e partidonan ta scoge nan lider?
Desde 1922, tur 20 prome minister Britanico a bin di sea Partido Labor of Partido Conservador. Esaki ta nifica cu miembronan di e partidonan aki tin un influencia desproporcional riba ken ta bay bira e prome minister di e pais. E proceso cu e partidonan ta usa pa scoge nan lider por mustra Byzantino.
Pa e Partido Conservador, e legisladornan mester prome indica nan sosten pa un lider potencial. Si tin suficiente sosten, e persona aki ta bira un candidato oficial. E ora tur MP Conservador ta haci un serie di voto, gradualmente reduciendo e cantidad di candidato te ora yega na dos. Finalmente, e miembronan ordinario di e partido – alrededor di 180mil di nan – ta vota entre e dos candidato aki. Ultimo biaha nan a scoge Liz Truss en bes di Rishi Sunak.
Si e MPnan por uni tras di un solo candidato, e ora no tin necesidad pa e miembronan ordinario di e partido tin un voto. Esaki a pasa ultimo biaha na 2016, tempo cu e legisladornan a sostene Theresa May despues di renuncia di David Cameron y automaticamente el a bira prome minister. Esaki por sucede atrobe.
E Partido Labor tin su propio proceso cual ta mas complica ainda.
Pero Gran Bretaña no a vota pa Boris Johnson na 2019?
Johnson a keda selecta pa su partido despues di renuncia di Theresa May. E ya tabata prome minister pa cinco luna na momento cu electornan a marca nan papeleta di votacion na december 2019. Sinembargo, sosten di e votadonan pa Partido Conservador a cementa su posicion como prome minister.
Sinembargo, hasta den e eleccion en cuestion tabata realmente apenas alrededor di 70mil persona cu a haya oportunidad pa vota directamente na fabor of contra Johnson – esnan cu tabata biba den su districto parlamentario di South Ruislip y Uxbridge, na west London.
Desde e tempo ey, otro prome minister, Liz Truss a bin y a bay, y un mas ta bay asumi e cargo pa fin di e siman aki – tur esaki sin mester molestia e electorado general.
Ta bay tin eleccion general pronto?
Constitucionalmente, na Gran Bretaña no ta rekeri un eleccion general pa dos aña mas. Pero cu prome ministernan bayendo y biniendo, selecciona pa un proporcion minusculo di e poblacion, cantidad di ciudadano Britanico a cuminsa puntra nan mes pakico nan no ta haya chens di influencia ken ta nan proximo lider.
E gritonan pa un eleccion general den futuro cercano probablemente ta bay zona mas duro.
