(AP)—E moon rover di India a confirma e presencia di zwavel y a detecta varios otro elemento cerca di e polo sur lunar mientras cu e ta busca pa señal di awa congela casi un siman despues di su haci su aterisahe lunar historico, segun e agencia di espacio na India a bisa ayera.
E instrumento spectroscoop tambe a detecta aluminium, hero, calcium, cronium, titanium, manganese, oxigeno y silicon riba e superficie lunar, e Organisacion di Investigacion Espacial Hindu, of ISRO, a bisa den un publicacion riba su website.
E rover lunar a cuminsa core riba e luna despues cu e aeronave a aterisa den cercania di e polo sur di e luna diaranson siman pasa. E Chandrayan-3 Rover ta espera di conduci experimentonan den 14 dia, ISRO a bisa.
E rover “ta confirma e presencia di zwavel,” ISRO a bisa. Tambe e ta buscando pa señalnan di awa congela cu por yuda misionnan astronautica den futuro, como un posibel fuente pa awa di bebe of pa traha combustibel pa e raket. E rover tambe lo studia e atmosfera di e luna y actividad seismico, Presidente di ISRO, S. Somnath, a bisa.
Dialuna e ruta di e rover a ser programa ora el a encontra un krater di 4 meter di hanchura. “Awo e ta bayendo den un direccion nobo,” segun ISRO. E nave ta move cu un velocidad di aproximadamente 10 centimeter pa seconde pa minimalisa shock of daño na e vehiculo.
Despues di un intento fracasa pa aterisa riba e luna na 2019, siman pasa India a uni cu Merca, E Union Sovietico y China como e unico cuatro pais pa logra e reto aki. E mision exitoso ta mustra India su crecemento como un poder espacial y tecnologico y ta apoya e imagen cu Prome Minister Narendra Modi ta purbando di proyecta: un pais ascendente cu ta trahando su luga entre e elite global.
E mision a cuminsa mas cu un luna pasa cu un costo di aproximadamente 75 miyon dollar. E exito di India a bin algun dia despues cu e nave Luna-25 di Rusia, cual tambe tabatin e obhetivo pa aterisa riba e polo lunar, a perde control den orbito y a accidenta. E mester a bira e prome aterisahe exitoso pa Rusia despues di 47 aña.
Activo desde e añanan 1960, India a lansa satelliet pa su mes y pa otro pais, y exitosamente a pone un den orbito cerca di Mars na 2014. India ta planeando su prome mision pa e Stacion Internacional di Espacio otro aña, den colaboracion cu Merca.
