E momentonan peligroso ta acercando na Venezuela

Nos ta asina custumbra caba cu diariamente nos ta tende solamente noticia negativo di e pais bisiña? Tin di nos lo bisa cu ‘nos lo wak ora cos yega asina leu’. Esey por ta e actitud, pero de bes en cuando nos mester tira un bista riba kico ta sosodiendo na e pais aki. No pa e consecuencia cu e por tin pa nos so, sino tambe pa e tragedia riba su mes cu ta tumando luga. E pueblo no tin suficiente cuminda y remedi, hospitalnan ta bira desespera pasobra nan no por yuda tur hende, specialmente no esunnan cu tin mester di remedi special cu practicamente a caba na e pais. Esey ta e imagen di tur dia cu nos ta haya. Banda di esey desde inicio di april tin demostracion constante ta tuma luga a base diario, cu a costa mas di nobenta bida caba.

Tur esaki por continua pa hopi tempo ainda, ya cu ta trata di un banda cu tin arma, y e otro tin nada mas cu e tenacidad di hende cu sa un cos so: stop di demostra y bay cas no ta un opcion mas! Esun cu tin e armanan, gobierno di Nicolas Maduro, ta hibando un maneho di violencia constante y selectivo, matando hende den filanan di e demostrantenan, pero no  ta permiti accion excesivo. Asina den tres luna nan a yega na nobenta morto, un pa dia. Banda di esey tin e intimidacion di aresto, maltrato, tortura, y encarcelacion permanente pa cierto contrincante.

Pero e situacion di protesta y represion selectivo aki a cambia, sin cu ta oposicion a cambia di strategia ni posicion. E cambio a bin den filanan di e Chavistanan mes. Un parti di nan ta sigui apoya Nicolas Maduro fielmente den tur buelta straño cu e por tuma, y esnan cu ta mira cu dia pa dia mas e presidente y lider di e partido socialista ta desvia di e herencia di Hugo Chavez, cu pa ambos grupo practicamente ta e reencarnacion di Simon Bolivar. E division entre e herederonan di Chavez a cuminsa bira mas visibel despues cu Maduro a dicidi cu ta bin un ‘asamblea constituyente’, cu personanan eligi via un sistema complica cu ta exclui e gran mayoria cu na december 2015 a vota den un forma grandi pa un cambio, cu tabata un derota aplastante pa e Chavistanan. Esaki tabata tambe e inicio di e intentonan pa termina gradualmente cu e parlamento legitimamente eligi na 2015, cu nunca a haya e espacio pa haci su trabao. Pa esaki gobierno ta haci uzo di un Tribunal Supremo, cu ta dirigi pa un Chavista ex polis y asesino condena, cu a studia ley den prizon y awor pa su lealtad a bira presidente di e corte mas halto di e pais. E tribunal bao di su dirigencia na 2016 caba a yega na e veredicto cu e parlamento no por actua legalmente y cu e tribunal mes ta sirbi como legislado. Un posicion ridiculo, y tambe indicador te unda e asunto a yega, algo si precedente den historia di e continente aki.

Pero algo a cambia. Cambia constitucion di 1999 ta significa cambia herencia sagrado di Hugo Chavez. Cambia e constitucion ta igual na bisa cu loke Chavez a laga atras no ta bon. Y aki e division a bin na luz di dia, principalmente personifica pa e Fiscal General di republica, Luisa Ortega Diaz. Mas cu e personanan femenino di oposicion, manera Lilian Tintori, esposa di preso politico Leopoldo Lopez, o parlamentario Maria Corina Machado, e ‘dama di hero’ di Chavismo a bira e contrincante grandi di presidente Maduro, cu den ultimo simannan ta acapara gran parti di e atencion politico. Naturalmente tin intento na caminda pa no sostene Ortega den e puesto importante cu e tin, pero esaki lo caba di profundisa e division cu tin den e filanan Chavista.

Tur esaki ta bay acompaña pa un profundisacion di e divisionnan den e forsanan arma di e pais, unda un parti no ta di acuerdo cu e actual linea di maneho. Loke ta hunga un papel tambe ta e situacion entre e rangonan halto di e aparato militar y policial, unda a tuma luga un enrikecimento barbaro a costo di e pueblo, pero cu e rangonan mas abao tambe ta sinti. Nan tambe ta pasa den problema di escasez di cuminda y medicina, nan tambe tin famia pa cria. E solo hecho cu un militar disidente ta secuestra un helicopter, ta tira riba edificio di tribunal superior y ta scapa di e escenario di tal forma cu te awe nan no por hay’e, ta bisa hopi di e conflictonan interno cu tin den e cuerponan uniforma. Y esaki ta e ‘game changer’ grandi: unda prome tabatin un grupo arma cu ta enfrenta un multitud sin mas arma cu nan curashi, awor ta creciendo dos forsa arma cu por bay enfrenta otro. E peligro di tur esaki por bay bira un situacion unda no tin orden publico mas, cu consecuencia cu violencia por yega na nivelnan cu nos no a mira ainda. Nos no ta nada mas cu e bisiña preocupa.